الرئيسية > آراء > هادي هي آجي آ مي نوريك دار خوالي ! من ديما و المرا المغربية كاتجبد بزولتها و تعطي لولدها يرضع فالاماكن العامة واخا يكون راسو قد الگريسون ! و وحدين قالك جاو يدافعو ليها على هاد الحق
04/12/2018 15:00 آراء

هادي هي آجي آ مي نوريك دار خوالي ! من ديما و المرا المغربية كاتجبد بزولتها و تعطي لولدها يرضع فالاماكن العامة واخا يكون راسو قد الگريسون ! و وحدين قالك جاو يدافعو ليها على هاد الحق

هادي هي آجي آ مي نوريك دار خوالي ! من ديما و المرا المغربية كاتجبد بزولتها و تعطي لولدها يرضع فالاماكن العامة واخا يكون راسو قد الگريسون ! و وحدين قالك جاو يدافعو ليها على هاد الحق

سهام البارودي – كود//

مع أنا فين ماكاين شي مجموعة فايسبوكية كاتلقاني فيها ! مؤخرا بانو ليا شي منشورات فبعض المجموعات النسوية الناطقة بالفرنسية ! دوك المجموعات لي كاتلقا فيهم دوك العيالات لي غالبا كايشوفو المغرب غا من الجاج ديال الطوموبيل !

مؤخرا دايرين حملة قاليك ” من أجل دمقرطة حق المرأة المغربية في الارضاع في الاماكن العمومية ” !فحال هاد الحملة كنت شفتها دارت هادي شي ثلت سنين و لا ربعة فميريكان !

وا شوف التمسخير كيف داير آ بن عمي ؟ شوف الديكالاج لي هاد الناس راهم فيه على المجتمع المغربي ؟

و قاليك حقا ما حقا ! خاص نشجعو العيالات باش يرضعو ولادهم فالزنقة حيت بزاف ديال العيالات كايخافو يديروها و حيت كايخافو يديروها داكشي علاش كايضطرو يجلسو فالدار و يسدو عليهم !

وا مادام ! وا مادموزيل ! واش مافراسكمش بلي البريستفيدين كيما كاتسميوه او الرضاعة من ديما و العيالات كايديروها ! و مامحتاجين لحد يدافع ليهم على هاد الحق لي عندهم ديجا ! من ديما و المرا المغربية تقدر تجبد بزولتها فالطوبيس ! المقاطعة ! التران ! الجردة و تلقمها لولدها ! و كاتلقاه رجليه مدليين من الحمال و راسو قد الگريسون و تاهوا  غا كايبدا يبكي و كاتبدا مو تراري بيه ” هانا وليدي ! هانا كبيدتي ! بغيتي زيزة ! هاك زيزة”  وكاتخشي زروالة يديها و تجبد شي زيزة اكبر من راس الكريسون و تلوحها ليه على وجهو تاكاتشرك ليه فم و نيف و عينين … و تغطيها بالحمال و لا طرف من الدرة و لا الشال لي دايرة ! و ماعمر هاد المنظر ديرونجا و لا خلق شي مشكل و لا شفنا شي مرا تمنعات تجبد ” زيزتها” و ترضع ولدها ! بالعكس منظر عادي تقدر تشوفو فالمدن و البوادي !

ايه طبعا غاتقدر تتلاقا مع شي مكبوت مرة مرة و لا شي مريض باغي يشوف زيزة ديال ماليها ! و لكن بصفة عامة هاد المسألة راه من ديما و هي كاينة و كادار و ماشي ممنوعة و لا مرفوضة من طرف المجتمع.

هاد النوع ديال المبادرات ! كاتبين بلي بزاف ديال العيالات لي باغين يهزو المشعل ديال  ” الدفاع على المرأة المغربية” ماعارفينش اصلا المشاكل الحقيقية لي كاتعيشها و لي محتاجة ليهم يدافعو عليها فيهم ! راه مايمكنش تستوردو شي مشكل من فرانسا و لا النگليز و تبغيو ترضوه بزز مشكل المغربيات !

شوفو غيرو …

موضوعات أخرى

15/12/2018 13:30

خديجة الكور الناطقة باسم البام: الوسام الحقيقي هو وسام الشعب وكنت غادي نتعين على رأس الهاكا لكن الرياح مشات فاتجاه آخر

15/12/2018 13:00

غير يكون بنادم كابر بالخبز وأتاي فهادي كافية أنه تردو وطني حقيقي غيور على البلاد وهو لي عارف مصلاحتها، وهذا هو الموضيل الجديد ديال ولد الشعب

15/12/2018 10:00

الحلقة الأخيرة من سلسلة “مرايا الأمراء والملوك والسلاطين المغاربة”…كيفية وطرق تمويل الشرعية السياسية للملوك المغاربة !! ح 180