عمر المزين – كود///

علمت “كود” أن تقارير وصفت بـ”السوداء” صادرة عن أقسام الشؤون الداخلية بعدد من العمالات ينتظر أن تعصف بعدد كبير من حاملي السلاح الظاهر خلال موسم الصيد المقبل 2025-2026.

ووفق المعلومات التي حصلت عليها “كود”، فإن كل صياد تبث أنه استعمل السلاح الناري في أمور معندها علاقة بالصيد بحال التهديد بارتكاب جنايات معمرو غادي يحلم ياخد الرخصة، وزيد عليها يلا شي صياد ضاع منو رخصة الصيد ومامشات عند البوليس أو الجدارمية دار إخبار بضياع هاد البيرمي حتى هو معمرو غادي ياخد الرخصة.

بالإضافة لهادشي، كاين حالات أخرى مرتبطة بالسحب النهائي لرخصة الصيد بحال يلا مات شي حد. مابقا ليه مياخد شي رخصة، بالإضافة إذا صدر حكم قضائي في حق أحد حاملي السلاح الظاهر لمدة تفوق سنة سجنا نافذا بسبب تورطه جنحية أو جنائية.

مصادر “كود” أوضحت أن السلاح الناري الذي يستعمل في الصيد راه ماشي حق بل هو امتياز وصافي، ويمكن للسلطات المحلية المختصة تسحبوا ليه في أي وقت من الأوقات.

الأخبار الواردة دبا حتى من الجامعة الملكية للقنص تفيد بأن حتى الصيادة اللي تسجلات فحقهم مخالفات خلال موسم الصيد الحالي مغاديش ياخدو البيرمي خلال الموسم المقبل ديال الصيد لكن ربما مؤقتا ماشي بصفة نهائية، خاصة الذين حررت في حقهم محاضر صادرة عن أعوان المياه والغابات وكذا الفرق التابعة للجامعة الملكية للقنص.

غير دبا اللي كاين خاص القانون يتبطق على كولشي.. كول واحد حصل كيصيد خارج أوقات الصيد أو فالليل أو بزاف ديال الحالات المنافية للقوانين الجاري بها العمل خاص الردع ديالو، بالإضافة للصيادة اللي ممسوقينش للسلامة وخاصهم غير يهزو السلاح وصافي.. الصيد راه أخلاق قبل كولشي.