عمر المزين – كود///

خرجات المديرية العامة للضرائب ببلاغ رسمي كتفكّر فيه مالكي السيارات بلي آخر أجل لأداء الضريبة الخصوصية السنوية على المركبات هو نهار 31 يناير 2026، ودعات الجميع لاحترام هاد الموعد باش يتفادو الغرامات والعقوبات القانونية.

البلاغ موجّه لمالكي السيارات اللي الوزن الإجمالي ديالها، مع الحمولة، ما كيتجاوزش 9000 كيلوغرام، أو اللي الوزن الفارغ ديالها داخل فهاد السقف، وكيهم الرسم السنوي ديال السنة الجارية 2026.

وأوضحات المديرية العامة للضرائب بلي السيارات الجديدة، اللي تم الشروع فاستعمالها خلال السنة، خاصها تخلص الضريبة داخل أجل 60 يوماً اللي كيتحسبو من تاريخ إيداع ملف الحصول على البطاقة الرمادية، وماشي حتى 31 يناير.

ومن جهة أخرى، شددات المديرية بلي أداء الضريبة السنوية على السيارات رجع مجاني عبر القنوات الرقمية، وكيتم بسهولة من خلال الشبابيك البنكية الإلكترونية (GAB)، المواقع الإلكترونية ديال البنوك، وتطبيقات الهاتف البنكي، بلا ما يحتاج المواطن يمشي للإدارة.