كود سبور//

قرر التونسي منذر الكبير يبعد 2 د اللعابا من العناصر اللي جابهم رئيس النادي عزيز البدراوي فالميركاتو الصيفي، وما غاديش يبقاو يلعبو فليماتش ديال الخضرا ابتداء من مواجهة اليوم الثلاثاء فتيران الفوسفاط مع 8 ونصف ديال لعشية، ضد أولمبيك خريبكة فانتظار توجد لهم إدارة الخضرا حل باش تفك معهم الجرة بلا نزاعات تقدر تزيد تغرق الفريق فالديون.

منذر الكبير قرر يبعد كل من الجزائري رؤوف بنغيث اللي أصلا من أول ما حط رجليه فالوزيز وتابعاه المشاكل، حيث الفريق ديالو السابق مولودية الجزائر كيطالب بحقو فاللاعب عند الفيفا والأخيرة عاطياه بطاقة دولية مؤقتة فقط باش يلعب مع الرجاء فانتظار يتحل المشكل ديالو، واللاعب الآخر هو الغابوني اكسيل مايي واللي سنا معه عزيز البدراوي قادما من اتحاد طنجة واللاعبين ما قنعوش الكبير والبدراوي مطالب دابا يلقى معهم حل.

ودائما مع ماتش الرجاء الرياضي ضد أولمبيك خريبكة، فالمدرب منذر الكبير حدد لائحة الخضرا للمواجهة، وبالإضافة لغياب مايي وبنغيث، فحتى محمد الناهيري ما لاعبش ضد لوصيكا، ولاليست فيها كل حراس المرمى الزنيتي، وكايا، وفخر، والدفاع فيه هدهودي، وحركاس، ومقدم، وعراسي، وبنتيك، ومذكور، وسط التيران فيه اهولو، والرياني، والصبار، ومكعازي، وزيردة، وفورسي، والهجوم فيه بولكسوت، وهبطي، وحدراف، وبوزوق، ورحيمي، وبنجديدة، وخابا.