سعيد الحسوني – كّود//

واحد الصباح ديال شهر 4 للي داز فطنجة، مع ديك 8 تقريبا، جا رجل محترم، تكون عندو 40 عام، طلب قهوة فمحلبة عصرية وسط المدينة مقابلة مع البناية اللي كيحطو فيها الدواصا ديال الفيزا د فرنسا، وباين عليه حتى هو كان كيستنى نوبتو فالفيزا.

أنا كنت جالس كنفطر، وكان المحل خاوي يالله جوج د الناس اللي كاينين، وواخا كنت بعيد شويا على الكونطوار لكن كنت كنشوف وكنسمع كولشي.

مور ما طلب السيد القهوة، جاوبوه الدراري اللي خدامين فيها، وقالو ليه مكنعطيوش قهوة بوحدها، خاصك تفطر، جاوبهوم وقالهم هاهي لائحة الأسعار ديالكم فيها قهوة، وأنا من حقي ناخد قهوة بوحدها أنا ديجا فاطر فالدار، المهم تعاندو معاه وحكّروه بصريح العبارة..

قالهم بغيت “جيرون” ديال القهوة نهدر معاه حيثاش هادشي ديالكم غير قانوني، بغيت قهوة وعندي الفلوس باش نخلصها خصكم تعطيوها لي، وهادشي واجب عليكم حيث هذا فضاء عمومي مفتوح للجميع مرخص له من السلطات وعندو قواعد ديالو باش كيخدم..

ناض واحد من دوك البراهش اللي تما جاوبو قالو أنا هو الباطرون، ولو بغيت قهوة خاصك تفطر، ولو بغيتي عصير واخا، نعطيوهلك بوحدو، ناض السيد جاوبو كاعي قالو واش بغيتي تشربني عصير بزز؟

الحاصول، الكليان ماخداش القهوة ديالو ومشا مقلق كيبركّم رجع شد الصف فالفيزا، وأنا بقا فيا الحال على هاد الحكّرة، لكن رجعت كملت تخمامي وكملت فطوري عادي ومشيت بحالي.

المشكل من بعد، هاد المشهد رجع كيطلع لي كل مرة فذاكرتي وكنحس معاه بالذنب، كنقول مع راسي علاش ما تدخلتش ندعم داك السيد اللي كان عندو الحق، وأكيد كون هدرت أنا وهدر كليان أخور كان غدي يتقوى الموقف ديالو وكانو غدي يجيبو ليه القهوة بلا خاطرهم.

وزاد عندي هاد الإحساس بالذنب ملي شفت واحد الفيديو ف “تيك توك” كيعاود قصة قصيرة عندها مغزى عميق، ديال أستاذ فمحاضرة طرد طالبة بدون سبب، يعني حكّر عليها وجرى عليها من قاعة الدرس غير هاكاك أمام اندهاش الزملاء ديالها.

ومن بعد ملي خرجات ناض كمل الدرس عادي، لكن الدرس أصلا كان كيدوي على هادشي، وحركة طرد الطالبة كانت فقط جزء من الدرس، هدر ليهم فيه على القانون وكيفاش المجتمع خاصو يحمي القانون ويعاون الدولة فتطبيقو، كيفاش؟

قاليهم خاص الناس لو شافو شي فلاش وقع حداهم كيخرق القانون أو الأعراف، ولقاو ريوسهم يقدرو يتدخلو باش يوقفوه، إذن ميترددوش، يتحركو ويبادرو ويوقفو الظلم والتعدّو والحكّرة، علاحقاش هاد المرة وقعات لواحد أخور، لكن أكيد مرة خرى غدي توقعليك نتا ومغديش تلقى اللي يوقف معاك..

الحاصول، داك السيد اللي ماخداش القهوة ديالو كنطلب منو السماحة، لأنني مُقصّر فهاد البلان بكل صراحة وباقى فيا الحال لدابا، لكن نتمنى يكون تحقق المراد ديالو وخدا الفيزا يمشي يبدل الجو شويا، ويتلقى لهيه بناس نقية أغلبهم كيحترمو الآخر وكيحترمو حقوق الغير.