سهام البارودي – كود//

هاد الايام فاش كانخرج كانرد البال لعباد الله لي دايرين الكمامة ! و لاحظت انه عدد لي دايرين الكمامات غادي و كاينقص ! والو واخا الحالات غادية و كاتزاد وواخا عياو مايهضرو فالتلفزة و يقولو لعباد الله ديرو الكمامة و لتازمو بالتباعد الاجتماعي ! عدد الناس لي كايلتازمو بالاجراءات اقل بكثير من عدد الناس لي مامسوقينش و هادشي مامحتاجش شي صونداج ! تقدر تخرج للزنقة و تمشي للاسواق و الحوانت و غاتلاحظ بلي بنادم عايش فحالا ماكايناش شي حاجة سميتها كورونا !

فواحد الحانوت سولت واحد البياع و شراي كايحتك مع مئات الزبائن فالنهار علاش مادايرش الكمامة ؟ قاليا ” غا مع الخدمة و داكشي …” مافهمتش شنو بغا يقصد بداكشي ! و علاش الخدمة غاتمنعو يدير كمامتو !؟! شوية هوا يقوليا و لكن لابغيتي نديرها نديرها وجبد واحد الكمامة كلها كاتفرتت من جيبو ! كحالت بالوسخ و خشاها فودنيه ! ” هانا درتها ! مزيان هاكا آ لالة؟” مابغيتش نزيد معاه فالهضرة و نقوليه كون درتي گرصونك فوق نيفك احسن من هاد الشرويطة ! قلت ليه مزيان و تقديت من عندو و مشيت !
و لكن واش فكل حانوت خاصني نقول لعباد الله ديرو الكمامة ؟ فكل قهوة خاصني نفكر السرباي يدير الكمامة لي فعنقو ؟! كل خضار فالسويقة خاصني نقوليه دير الكمامة ؟! مايمكنش ! هادشي راه مسؤولية الدولة هي لي عارفة المواطنين ديالها شنو كايسواو ! و بلي لاماحركتيش ليهم القياد و المخازنية و جبدتي معاهم بالغرامات راه و الله مايديرو الكمامات !
شنو هاد التعنتيت لي عندنا ؟
علاش بنادم راسو قااااصح تال هاد الدرجة ؟!

القرارات اذا ماكانش غايرافقها صرامة فالتطبيق فالواقع راه ماغاتنفعنا بتا خصية ! و حنا ماعندناش شي شعب لي عندو حس المسؤولية طالع ! راكم عارفين خروب بلادي ! كاين لي يمرض بكورونا و مايقولهاش حيت منوي مع مخو ! شحال من جارة تمرض بكورونا و تخبيها على الجارات باش “مايشمتوش ” فيها ؟ و شحال من واحد غايمرض بكورونا و عوض يشد لارض فدارو غايخرج و يتقدا و يبيع و يشري و ينشر كورونا حيت غايقوليك ماسوقيش آ خويا ! واش نموت بالجوع انا و لا ؟! و شحال من وحدة غاتجيها كورونا و تمشي عند الكليان حيت خاصها تشد الفلوس و حيت الفلوس اهم من الصحة بالنسبة ليها!

تا راه بنادم كاميكاز فهاد البلاد و الله ! كاتحس بيه مستاعد يموت ! باغي يموت ! مامسوقش هوا لا لصحتو لا للصحة الناس لي دايرين بيه ! واش كاين شي ارتباط بين درجة القوادة لي كاتعيشها فحياتك و عدم الرغبة ديالك فحماية راسك ؟ غالبا كاينة شي علاقة ! ولكن هادشي ماكايعنيش انه غي لي مقودة عليهم لي مامسوقينش لكورونا حيت كاينين لي قاريين و لاباس عليهم و لي فراسهم فراسهم !