وكالات//

وقعات واحد الروينة نهار الاحد اللي فات فمطار تشيناي الدولي فالهند، ملي واحد المسافر لقى حنش كيدور على يد الشنطة ديالو، وكان الطول ديالو تقريبا مترو. هادشي خلّى الناس اللي كانو تماك يتخلعو ويبداو كيغوتو ويطلبو المساعدة.

فالتفاصيل، ولّي جا فمواقع محلية، المسافر وصل فالصباح بكري للمطار، ومن بعد ما سالا الإجراءات ديال الهجرة والجمارك، شد الشنط ديالو وحطهم فوق العربة، وتّجه للخارج باش يتلاقى مع العائلة ديالو اللي كانت كتسناه فالطوموبيل. ولكن ملي كان باغي يحط الشنط فالطوموبيل قرب نقطة الاستلام، شاف داك الحنش ملفوف على يد الشنطة.

الناس فالأول شكو بلي راه كوبرى سامة، وهادشي زاد الخلعة عندهم. شحال من واحد حاول يقتل الحنش، ولكن رجال الأمن منعوهم وقالو خاصنا نتسناو رجال الإطفاء.

من بعد، تبين بلي داك الحنش راه غير أفعى مائية وماشي سامة. رجال الإطفاء جابو أدوات خاصة وخرّجو الحنش من الشنطة بلا ما يضروه، وحطّوه فواحد العلبة بلاستيكية، ومن بعد عطاوه للناس اللي كيهتمو بالبيئة باش يرجعوه للطبيعة ديالو.