وكا لات //

فواحد المشهد اللي كيتعاود كل عام، استقبلو السبيطارات فتركيا آلاف المصابين فنهار اللول ديال العيد الكبير، بسبب الحوادث اللي وقعات ف الوقت للي كانو الناس كيدبحو الكباش. وبلغ عدد الناس اللي تجرحو هاد العام 14,372 واحد، حسب ما قال وزير الصحة التركي كمال مميش أوغلو.

الوزير قال فواحد التدوينة فـ”إكس” (تويتر سابقاً) باللي الإصابات تفرقات على بزاف ديال المدن، وكان أعلى عدد فالعاصمة أنقرة بـ 1,049 جريح، من بعد جاو إسطنبول بـ753، ومن بعدهم قونية بـ655، وغازي عنتاب بـ634، ومانيسا بـ572.

مميش أوغلو زاد وقال إن هاد الحوادث كان ممكن يتفاداو بسهولة إلى كانت عملية الذبح كتدار على يد ناس مختصين، وطلب من الناس يعتمدو على الكزارة اللي عندهم تجربة وتدريب فهاذ المناسبة اللي كتعاود كل عام.

وكيقولو بعض الأطباء والخبراء أن الاعتماد على الناس اللي ما عندهمش تجربة فالذبيحة، خصوصاً فالزنقة ولا فالدار، كيخلي نسبة الجرحى ترتافع بزاف، وكتكون الإصابات متنوعة ما بين تقطاعات، نزيف، ولا حتى الكسور اللي كتوقع من السقوط أو الاستعمال الخاطئ للأدوات الحادة.