وكالات//

توصل واحد الفريق ديال الباحثين لواحد الاكتشاف مهم: الشمبانزي كيعرفو كيفاش ينظفوا ويعالجوا الجروح ديالهم!

الباحثين اللي كيدرسوا حياة الشمبانزي ف غابات بودونجو ف أوغندا، لقاوا أن هاد الحيوانات الذكية ماشي غير كيعالجوا الجروح ديالهم بوحدهم، بل حتى الجروح ديال الشمبانزي الآخرين اللي معاهم ف نفس المجموعة.

هاد السلوكيات خلات الباحثين يعتقدوا أنها ممكن تكون كتشرح لينا كيفاش كان الإنسان الأول كيعالج راسو، وحتى شنو هما المواد أو الأعشاب اللي كان كيستعمل باش يداوي الجروح ديالو.

وخا سبق وشافوا سلوكيات مشابهة ف مجموعات أخرى ديال الشمبانزي، إلا أن تكرار عمليات العلاج والتداوي بين الشمبانزي ديال غابات بودونجو كيبين بلي هادشي راه سلوك عادي و منتشر بيناتهم، وماشي غير شي حاجة فردية كيديروها باش يعاونو غير ولاد عائلتهم.

هاد الاكتشاف كيزيد يورينا شحال الشمبانزي قراب لينا ف بزاف ديال التصرفات، وحتى ف الذكاء الاجتماعي ديالهم.