وكالات//

مدينة شنغهاي كتوجد باش تفتح أول قاعة رياضية فالشينوا مخصصة للحيوانات الأليفة، خصوصا الكلاب، وسمّاوها”Gogogym” .

هاد الخطوة جاية فإطار تحسين صحة الكلاب والوقاية من الأمراض عن طريق برامج رياضية معمولة خصيصا ليهم.

هاد الجيم تابع لعلامة تجارية سنغافورية سميتها”Hill Pet Care”، اللي كتخدم فمجال العناية بالحيوانات الأليفة، وهاد القاعة مجهزة بأربعة أقسام كبار: صالة ديال التمارين البدنية، منطقة سبا للتأهيل، غرفة ديال التدليك، ومساحة للترفيه خاصة بالكلاب.

الناس اللي كيسيرو Gogogym قالو بللي الهدف ماشي غير التسلية، ولكن كيبغيو يوفروا رعاية صحية متكاملة للحيوانات الأليفة، عن طريق خطط تدريب شخصية كيشرفو عليها مدربين مختصين، كياخدو بعين الاعتبار العمر، الحجم، السلالة، والحالة الصحية ديال الكلب.

دابا القاعة داخلة فمرحلة تجريبية قبل الافتتاح الرسمي اللي مبرمج فـآخر يونيو، ومازال ما علنوش على الأسعار النهائية ديال العضوية، ولكن الناس اللي كيشاركو فالحملات الترويجية كيدخلو مجاني ولا كيستافدو من تخفيضات خاصة.

وفإطار الدعاية، دارو Gogogym مسابقة فمواقع التواصل باش يختارو كلاب يكونو واجهة إعلانية للجيم. اللي ربحو فالمسابقة خداو عضويات مجانية وفرصة يحضرو لحصص تدريبية قبل ما تفتح القاعة رسميا.