سهام البارودي – كود//

الحوادث المنزلية معروفين من اهم الاسباب في وفايات الاطفال داخل البيت و على رأس هاد الحوادث المنزلية كاين ” السقوط” دري صغير راه يقدر يطيح ليك من الناموسية ! من شرجم ! من بالكون ! من سطح ! من بير الى غفلتي عليه غي دقيقة و شحال من ام غسلات لولدها و مشات تقلب ليه على فوطة رجعات لقاتو غرق ! داكشي علاش الواليدين مسؤولين على السلامة ديال الطفل و داكشي علاش الاهمال جريمة كايعاقب عليها القانون فالعالم كامل من المغرب تال ميريكان تال الطايلاند !

ماتقولش ليا راه محروق على كبدتو و لا راه بقا فيا لا مسكين لا تاخصية ! الواليدين هوما المسؤولين الاولين على شنو وقع للطفل ريان ! فين كانو ؟ مخليين طفل عندو خمس سنين بوحدو ؟ و علاش مافكروش يسدو البير و هوما عارفين انه عندهم طفل فالدار ؟ واش ماشي الاهمال هذا ! هذا هوا الاهمال براسو و برجليه !

حيت فاش كانهضرو على العنف لي كايتعرضو ليه الاطفال راه ماكاينش غي العصا و السبان ! كاين حتى الاهمال ! فاش ماكاتسوقش لطفل و ماكاتعطيهش ياكل راه عنف هذا ! كاتخليه يطيح راه عنف هذا ! كاتخليه يغرق راه عنف هذا! اعتداء عليه

هادشي علاش هاد المأساة ديال الطفل ريان خاصها تفيق من الگلبة بزاف ديال الآباء لي ماكاين غا ولد و طلق ! و توعيهم بالدور ديالهم الأول لي هوا حماية داك الطفل لي هوما لي جابوه للدنيا ! ايوا ماتولدوهمش لا كنتو غاتكرفصوهم !