كود جنيف ///

المغرب حاضر فمكتب الامم المتحدة بجنيف. حاضر بنساؤو. رجالاتو خاصهم الخدمة اكثر باش يتألقو. فهاد المعرض اللي تفتاتح رسميا هاد الصباح اليوم الثلاث 24 يونيو 2025 بالبناية  E بمقرها بجنيف السويسرية وفيه 74 صورة لمرأة رائدة فتاريخ البعثات الدائمة لمكتب الامم المتحدة بجنيف
فهاد المعرض كاين جوج مغربيات.

الديبلوماسية السابقة حليمة الوزاني اللي كانت فالبعثة المغربية بجنيف فالستينات فالقرن الماضي. كانت مغربية رائدة. وصفوها فالمغرب ب”صاحبة الصوت القوي” المدافعة عن حقوق الاقليات. حداها كاينة ديبلوماسية مغربية اخرى وهي ماجدة الموتشو. معروفة بتدخلاتها القوية ودحض الدعاية الجزائرية فموضوع الصحرا. دوزات سنوات وتألقات هنا فجنيف ودابا مكملة نفس المهمة فالبعثة الدائمة للمغرب فنيويورك.

المعرض قدم المغربية الثانية ماجدة الموتشو باللي ديبلوماسية قافزة. قال باللي هي نائبة الممثل الدائم للمملكة المغربية لدى الأمم المتحدة في نيويورك. عندها خبرة واسعة. سبق ليها خدمات فالبعثات الدائمة للمغرب فجنيف واليوم فنيويورك.

واشاد المعرض بكفاءتها العالية وفصاحتها. وقال باللي كتساهم بشكل فعال ف”إبراز الدور الريادي للمرأة المغربية في السلك الدبلوماسي وفي الدفاع عن أولويات المغرب في المحافل متعددة الأطراف”.

المعرض الفني بعنوان “ما كاينش شي مهنة للعيالات؟ طريقة اختارها مكتب الامم المتحدة فجنيف لمعرضه الفوتوگرافي. هاد الشي داخل فمشروع ديال هاد المكتب بعنوان: “لنغير تصوراتنا”. دار بشراكة مع المنظمة الاوربية للابحاث النووية والاتحاد الدولي للاتصالات، قدمت اليوم صورا لمعرض جديد. 
هاد المعرض هو الثاني بعد اخر “نطيحو الحواجز فالرياضة”، يعيد الاعتبار للمرأة ومساهماتها الرائعة في العلوم والتكنلوجيا والهندسة والرياضيات.
هاد المعرض كيقدم تصاور فمكتب الامم المتحدة بجنيف وفمنظمة الاوربية للابحاث النووية والاتحاد الدولي للاتصالات. فيها تشديد على دور المرأة الرائد فالامم المتحدة.

المعرض فيه 112 صورة فوطوگرافية، فيهم 74 صورة لرائدات فالبعثات الدائمة لمكتب الامم المتحدة بجنيف.