كود كازا ///

الحكومة خاصها اليوم قبل غدا تغير شي وجود فيها. خاصها كفاءات وناس كتخدم. فيها عدد من الوزراء والوزيرات غير زيدين. شوفو مثلا الناطق الرسمي بايطاس مصطفى ماشي غير ما معاونش الحكومة وخدام لصورتو٬ بل ما قادرش يوصل حتى اللي كدير هاد الحكومة. ماشي غير هو. 
البارح كانت الخطوط الملكية المغربية قدمات من خلال مديرها العام حميد عدو رؤيتها “الاستراتيجية والمتوقع الجديد لعلامتها التجارية”.

فالحكومة جات غير ليلى بنعلي وزيرة الطاقة وماشي فاللول. حتى بدا النشاط. لكن الغريب ان واحد لوزير اسمو محمد عبد الجليل محسوب على الاستقلال وعندو حقيبتي “النقل” و”اللوجستيك” ما بانش. ما كانش فحدث كيهم القطاع اللي كيشرف عليه. 

وزير غايب على الساعة. ما كيعرفو حد. نشاط كبير بحال هادا كان يطلب من رئيس الحكومة يخرج من البرلمان ويجي٬ خصوصا انو ماشي مهم يبقى فالبرلمان اللي كان فيه اخنوش.

دابا علاش ما يتجمعش هاد القطاع مع قطاع اخر ويجيبو شي حد او وحدة عندها او عندو لكتاف يعطي فهاد القطاع. امثال عبد الجليل ما كيضربوش غير الحكومة٬ كيضربو بلاد عندها تحديات كثيرة وكبيرة بحال اعمار الحوز وكأس افريقيا للامم 2025 ومونديال 2030