كود – أكادير///

شدو البوليس فأكادير بعدمعطيات دقيقة قدماتها مصالح الديستي، خلال الساعات الأولى من صباح اليوم الأحد 18 غشت الجاري، هداك اللي شفر عائلة من داخل مؤسسة فندقية متبوعة بالسياقة فحالة سكر ودار كسيدة سير مميتة.

وكان البوليس فأكادير باشر بتاريخ 08 غشت الجاري، إجراءات معاينة كريساج من داخل أوطيل بنفس المدينة، تمكن خلالها هاد الموقوف من الاستيلاء على متعلقات شخصية وفلوس، فضلا عن سيارة كاط كاط كتخص الضحية كانت واقفة بمرآب نفس لوطيل.

هاد الموقوف كان تسبب لاحقا فكسيدة مميتة خارج المدار الحضري باستخدام السيارة المسروقة، نتج عنها وفاة 3 ديال الركاب كانوا على ف طاكسي دخل فيه .

ومكنات الأبحاث المكثفة اللي باشرتها مصالح الأمن الوطني من تحديد هوية المشتبه فيه، اللي بينات عملية تنقيطه أنه كيشكل موضوع بزاف د مذكرات بحث من أجل السرقة، قبل أن يجري توقيفه صباح يومه الأحد بمدينة أكادير.

ودبا كيجري إخضاع المعني بالأمر لبحث قضائي تحت إشراف النيابة العامة المختصة، وذلك قصد تحديد كافة ظروف وملابسات وخلفيات ارتكاب هاد الأفعال الإجرامية.

وعرفتت أكادير فالساعات الأولى من صباح يوم الخميس 8 غشت عملية سطو كتشبه للأفلام الأمريكية، وهادشي وقع مورا الثالثة صباحا مني دخلو  شفارة على عائلة تتكون من مرا و3 من بناتها والوالدين ديالها.

الضحية هضرات معاها “كود”، وأكدت بلي هي نازلة فواحد لوطيل مصنف واسمو “Flat hotel agadir” وخدات هي وعائلتها سيمانة باش يدوزو العطلة، وداك النهار فالصباح بكري تفاجئوا بالشفارة دخلوا عليهم من الشرجم ديال الكوزينة وهوما ناعسين.

هاد السيدة وضحات باللي مشافوش هوما هاد الشفارة، وأضافت: “يقدرو يكونو دخلو علينا مع داك الثالثة ونصف أو الرابعة ديال الصباح، وهزو لينا الصيكان وخواوهم فالحمام، ومن بعد هادشي هزو لينا حتى الطونوبيل اللي كانت باركي حدا لوطيل ومشاو.. وراه عندهوم كاميرا والبوليس مني جاو شافو كولشي ووراونا حتى داك اللقطة وكبيان غير التالي ديال السيارة غادية.

وبخصوص واش تعرفو هاد الشفارة أو مزال، فقد أكدت هاد السيدة باللي مزال هي معارفاش واش الملامح ديالهم واضحين فالفيديو او اللا، مؤكدة باللي دبا البحث متواصل، وأشارت باللي الشفارة خداو ليهم فلوس والذهب (جوج كورميطات وخاتم وبورطابل آيفون 7، و 26 ألف درهم، وعاد فلوس متفرقة وتتراوح بين 700 درهم و1000 درهم.

الضحية وجهت صرخة عبر “كود” على هادشي اللي وقع ليها مع عائلتها ت هاد الشفارة يتشدو وترجع السيارة ديالها، وزادت قالت باللي هادشي تعرف مباشرة بعدما فاقت الوالدة ديالها فوقت لفجر، وقالت باللي دبا تبين أن الفندق غير مؤمن وخا مصنف.