محمد سقراط-كود///

في ألفين وتمنية كان خرج المغراوي ولي مكيعرفوش راه من واحد من أهم دعاة السلفية في المغرب وتلميذ تقي الدين الهلالي وعندو العديد من دور القرآن في المغرب، وكان ولازال من أهم دعاة السلفية في المغرب، المهم كان خرج فتوى بجواز زواج الصغيرة البنت لي باقي ماجاهاش الحيض تكون عندها تسعسنين تكون عندها طناش بحال بحال، وإستند طبعا للقرآن والسنة وبالخصوص في صورة الطلاق فين مذكورة عدة المطلقة، وفيها كان التي لم يحضن، شكون لي ماحاضوش طبعا هوما البنات الصغار، وحتى في صحيح البخاري كاين باب زواج الشيخ من الصغيرة وفيه شلا أحاديث، والشيخ المغراوي استدل بهادشي كامل وكانت ناضت فضيحة داك الساعة وكان المغراوي في السعودية وبقا مادخلش للمغرب حتى بردات الأمور، وداك الساعة كان خرج المجلس العلمي بيان يصف فيه المغراوي “بالفتان الضال والمضل وبالشخص لي معروف بالشغب والتشويش على مذهب الأمة وتوابثها”، ولكن المجلس العلمي ماردش على مصادر المغراوي واش كاينة بصح في الدين أو مختلقة أو كاينة ولكن مابقاتش صالحة لهاد الوقت، فقط شيعوا في المغراوي سبان وسكتوا، أما منين جاب المغراوي هادشي مردوش عليه.

هاد اليوماين واحد الغلام سلفي مغربي كينشر هاد الفكر في مواقع التواصل كيدافع على زواج الصغيرة، وطبعا هجموا عليه وعارضوه مغاربة عقلاء كيعتابرو أن الأمر تشجيع على البيدوفيليا، منهم لي كيناقش الأمر من خارج المنظومة الدينية وهاداك واضح وباين وكاين لي من داخل المنظومة ولكن بتفسيرات تواكب روح العصر وتحترم القانون ديال البلاد، وكاين لي كينكر أن هادشي أصلا كاين في الدين، طبعا بلا منهدرو على لي كيتفقوا معاه في العلن أو في السر ويبدون العكس في العلن، طبعا دتكشي لي كيقول خاصو يتعاقب عليه وتم رفع دعوى عليه لأنه كيشجع على البيدوفيليا الواضحة، واخا كيبررها بديك الى كانت عندها القدرة على الممارسة، مالها دجاجة راه بنت عندها عشرسنين وتسع سنين وخمسطاش وسطاش راه حتى الى مكانش طفلة جسديا راها طفلة عقليا، والقانون وضح هادشي واخا للأسف زواج القاصرات باقي منتاشر بزاف في المغرب، راه القاصرات حتى في الغرب كيتصاحبو مع لي قدهم ماشي كيتزوجوا رجال كبر منهم بالضوبل ديال عمرهم.

الموشكيل الى رفع شي واحد دعوى بهاد السيد وتشد و تعاقب داك الساعة خاص نرفعوا دعوى حتى على لي كيبيع صحيح البخاري لأنه كيبيع كتاب يشرع البيدوفيليا، وخاص يتمنع هاد الصحيح من المغرب، وخاص يخرج المجلس العلمي ويتحلى بالشجاعة الفكرية والعقائدية باش يعطي تفسير حداثي للنصوص الدينية لي كيستاندو عليها هاد دعاة الزواج بالأطفال، راه خاص المجلس العلمي يقصد العوينة عوض يستهدف الأشخاص وعلاش لا يطور الدين ويخرج نسخة منقحة منه، الإسلام نيت لي كنتابعوا دابا راه نسخة منقحة ومزيدة من إسلامات عديدة تبعناها عبر التاريخ، هاداك الغلام لي كيقول معندوش موشكيل يتزوج طفلة آه راه بيدوفيل وخاصو يتعاقب، ولكن راه حتى النص منين جاب داك الهدرة خاصو يتنقح أو يتلقى ليه تفسير أو تخريجة تخليه مواكب العصر، راه كاع الأديان لي ستمروا في الوجود ونجحوا كانوا كيتطوروا مع المجتمع ماشي كيبقاو جامدين محتافظين بنفس النصوص، وهذا هو دور المجلس العلمي هو يخرج نسخة منقحة ومزيدة من الدين تتماشى مع روح القانون ديال هاد العصر عوض الإكتفاء بالرد على الأفراد كأنهم جابوا داكشي من راسهم.