كود -وكالات//

كشفات مصادر إيرانية  لصحيفة “نيويورك تايمز” أن المرشد الأعلى الإيراني الجديد مجتبى خامنئي كايعيش فالعزلة تحت حراسة مزيرة، وكيخضع لعلاج  من إصابات خطيرة تعرض لها فالدقة اللي استهدفت عائلتو فـ28 فبراير الماضي، واللي مات فيها باه ومرتو وولدو.

وكتقول نفس المصادر أن خامنئي تحرق فوجهو وتضرب فرجليه مع وجهو وفمو، وهاد الشي لي خلاه عندو مشكل فالكلام والتواصل الشفهي، وهي أكبر مشكلة عند قائد خاص يكون صوتو رمز السلطة والثقة ففترات الأزمات، مجتبى حتى لدابا دار ثلاثة العمليات جراحية وغادي يركب طرف اصطناعي فرجليه، وزيد عليها عمليات فإيدو وترميم للوجه.

وخا أن تركيزو العقلي باقي سالم حسب المصادر، ولكن مقدرش  يسجل حتى رسالة صوتية ولا مصورة باش مايبانش ضعيف فأول ضهور ليه وعوض التواصل الرقمي اللي ممكن يبين بلاصتو للاستخبارات الإسرائيلية، كيعتمد فريقو على رسائل مكتوبة ومختومة.

أما من ناحية المتابعة الطبية، فالرئيس مسعود بيزشكيان كيتكلف شخصياً، بصفتو جراح قلب، مع وزير الصحة، بمتابعة خطة العلاج، فمشهد كيبين الترابط الكبير بين السياسة والطب فهاد المرحلة الاستثنائية.