وكالات//

إضراب نادر ديال الشوافرية ديال الترانات  فولاية نيوجيرسي القريبة من نيويورك، نهار الجمعة، دار البلبلة عند عشرات الآلاف من الناس اللي كانو باغيين يمشيو لنيويورك باستعمال النقل العمومي.

هاد شبكة السكك الحديدية العمومية فولاية نيوجيرسي وقفات الخدمة ديالها بشكل كامل من منتصف الليل، بعدما المفاوضات بين النقابة اللي كتمثل الشوافر والإدارة فشلات، خصوصا فموضوع الزيادات فالأجور.

هاد الإضراب، اللي هو الأول من نوعو من سنين طويلة، أثر بزاف على الناس اللي كيعتمدو بشكل يومي على هاد القطارات الرخيصة باش يمشيو ويجيو من وإلى نيويورك، بحيث أن البدائل اللي كاينة قليلة وغالية بزاف، حسب وكالة “فرانس برس”.

النقابة المسماة”BLET” ، اللي كانت كتفاوض مع الإدارة حتى ليلة الخميس لي فات، كتقول إن الأعضاء ديالها ما شافوش زيادة فالأجرة ديالهم من 5 سنين، وكيطالبو باتفاق جماعي جديد يخدم مصلحة 450 موظف.

وقال رئيس النقابة، مارك والاس، فواحد التصريح: “الإدارة عندها الفلوس باش تدير مكاتب فخمة، ولكن ما عندهاش باش تخلص الناس اللي خدامين فالصفوف الأمامية”.