گود سبور//

متمسك النجم البرازيلي نيمار جونيور بحلم المشاركة فكاس العالم 2026، وباغي يلعب مع البرازيل فالمونديال للمرة الرابعة، واخا هاذ الشي صعيب مع المدرب الحالي ديال السامبا، الطالياني كارلو أنشيلوتي اللي شارط عليه الجاهزية البدنية والمستوى المزيان باش يعيط له.

وجواب نيمار على سؤال واش غادي يكون فمونديال 2026، قال فتصريح للإعلام البرازيلي من ورا ماتش الفريق ديالو سانتوس ضد سان لورينزو: “بالتأكيد هذا حلم ديالي، وهاذ الشي اللي كيفكر فيه أي لاعب برازيلي، وهو يكون تماك، وكانتمنى نكون حاضر فيه”.

نيمار توقع يكون الفينال فكأس العالم 2026، بين منتخب البرازيل والأرجنتين حاملة اللقب.

للإشارة فالمنتخب البرازيلي طاح فالگروب الثالث فمونديال 2026، مع المنتخب الوطني المغربي وأسكتلندا وهايتي، وأول ماتش له فدور المجموعات غادي يكون مع المغرب يوم 13 يونيو فتيران نيوجيرسي الميريكانية.