كود -وكالات//

معروف الممثل العالمي نيكولاس كيج بالتمثيل و الحماق ديالو ف السينما لي خلاه يربح الأوسكار، ولكن قليل لي كيعرف بأنه كيخسر الفلوس الصحيحة ف حوايج  ما طيحش على البال، لدرجة أنه شحال من مرة خوا الحساب ديالو فالبنكة بسباب هاد الهبال.

و من بين أغرب اللقطات ف حياتو هي فاش خسر كثر من 150 ألف دولار باش يشري أخطبوط كبير ودار ليه حوض وسط الفيلا ديالو.

السبب اللي خلاه يشريه،  هو أنه كيعتبرو”أستاذ التمثيل” ديالو، وكان كيجلس يقابلو بالساعات باش يتعلم منو حركات جسدية غريبة كيطبقها ف الأفلام ديالو.

وما حبسش البلية ديالو غير فالبحر، حيث جاب لدارو غراب أفريقي كحل  سماه “هوغان” ودار ليه قفص د الزاج كبير وسط الصالون.

هاد الغراب طلع ذكي لواحد الدرجة ما تصورش، ولكن المشكلة هي أنه ما كيعرفش الصواب، وكان كيتسنى غير الضياف يدخلو للدار باش يبدا يسب  ويخسر معاهم الهضرة بكلام غليظ.

الفنان كملات الباهية مني قرر يربي جوج كوبرات ملكية غابرة ف الدار، وهاد النوع معروف بالسم القاتل ديالو .

كيج وخا كان عندو الترياق ديالهم، ولكن الجيران ديالو تخلعو وما بقاوش كيجيهم النعاس، وفالآخر اضطر يتبرع بيهم  لحديقة حيوانات باش يتهنى من الصداع.

الحماق ديال نيكولاس كيج ما وقفش غير عند الحيوانات ، وإنما شرا حتى  طجمجمة ديال ديناصور حقيقي (T-Rex) بـ 276 ألف دولار ف واحد المزاد علني تنافس فيه مع ليوناردو دي كابريو.

ومن غير هادشي، شرا حتى قصور قديمة ومهجورة، وشرا قبر كبير على شكل هرم فمقبرة مشهورة باش يتدفن فيه فاش يموت

الحاصول كيبقا نيكولاس كيج حالة فريدة من نوعها ف عالم المشاهير، حيت كيشوف باللي هاد التسطية والتصرفات الغريبة هي اللي كتغذي العبقرية ديالو ف التمثيل.

هو كيبان للناس هبيل وهارب ليه، ولكن هو كيحس بلي هادي الطريقة الوحيدة باش يقدر يخلي السمية ديالو محفورة ف تاريخ هوليوود بطريقة مختلفة على كاع الممثلين الآخرين.