كود سبور//

مازال فريق نيجيليك من النيجر مؤمن بالحظوظ ديالو فالتأهل لدور ليكروب من دوري أبطال إفريقيا وثايق قالقدرات ديالو على إحداث المفاجأة هنا فالمغرب ضد الرجاء فالماتش روتور من الدور 32 فالمسابقة، وخا خسر مع الخضرا فالنيجر بهدفين لزيرو فالألي.

ووضح مدرب نيجيليك دجيبو طاهر فتصريح له أن الفريق ديال النيجر ما عندوش خبرة كبيرة فالمسابقات الإفريقية، الأمر اللي جعل اللعابا ديالو يطيحو فالاغلاط ضد الرجاء وهو اللي خلاهم يخسروا الماتش ألي مع الخضرا.

المدرب ديال نيجيليك أكد أنه غيجي هو والفريق ديالو من النيجر إلى المغرب السبت الجاي، باش يديرو المفاجأة ضد الرجاء ومؤمنين بالحظوظ ديالهم فماتش الروتور وكيوجدو له مزيان.

للإشارة فالرجاء الرياضي حقق رباح مهم على نيجيليك السبت الماضي فالنيجر بنتيجة 2 بيوت لزيرو، فذهاب الدور 32 من دوري أبطال إفريقيا، ودار الرجل الأولى ديالو فدور ليكروب من المسابقة فانتظار ماتش روتور السبت الجاي فستاد دونور فكازا، مع العلم أن المواجهة غادي تلعب ويكلو بلا جمهور بسبب العقوبة ديال الإتحاد الإفريقي لكرة القدم على الرجاء واللي غادي يلعب 2 ماتشات بلا بيبليك الأول غادي يكون السبت الجاي ضد نيجيليك والويكلو الثاني غادي يكون فأول ماتش من دور ليكروب ملي يتأهل له.