كود – سبور //

علنات منصة Netflix على موعد عرض السلسلة الوثائقية الجديدة “رافا”، اللي كتسلّط الضو على المسار ديال أسطورة التنس رافاييل نادال، ومن المعلوم أنه غا يخرج  فـ29 ماي الجاي، ولي كيبين بصورة قريبة وإنسانية على اللاعب، خصوصاً فآخر عام ليه فالمنافسات الاحترافية فـ2024.

التريلر ديال السلسلة بين لقطات قوية من مسيرة نادال وما بين ماتشات عامرة بالجماهير ولقطات عائلية حميمية كتبين الجانب الشخصي ديالو، نادال قال فواحد التصريح مؤثر: “الناس كيشوفوني رابح، ولكن أنا غير منافس”، وهي جملة كتعكس العقلية ديالو اللي مبنية على التحدي.

وفواحد اللحظة مؤثرة فآخر الإعلان، بان نادال وهو كيحبس الدموع ديالو، وصرّح: ’’مايمكنش تكون بطل كبير إلا ما درتيش شي حاجات صعيبة بزاف”، فإشارة للثمن الكبير اللي خلّصو جسدياً ونفسياً باش يوصل لهاد النيڤو.

السلسلة ديال 4 الحلقات من إخراج زاك هاينزلينغ فيها شهادات من نجوم كبار فالتنس بحال روجر فيدرر ونوفاك ديوكوفيتش، العمل غادي يعطي نظرة على حياة نادال، من البداية ديالو وهو صغير حتى لآخر مسارو الرياضي.