هشام نوستيك – كود//

مين تايكون فيلم الرسالة هو أحسن فيلم عندك ومن صغرك ونتا عايش فقوقعة ديال أحلام اليقظة الدينية، يقدر يحزق ليك الفرخ واحد النهار وتلقى راسك تتاكل العدس فالعواكش.

الصديق ياسين المعروف بإسم مول الفوقية طرا ليه للأسف هاد لبلان وناض تايهدد الدولة والشعب بحرب أهلية يلا تعدلات المدونة بشكل يخالف الشريعة الإسلامية.

كاين بزاف ما يتقال على تدوينة السيد ياسين. أولا علاش مربي الكبدة غير على مدونة الأسرة؟ للي سمعك يقول المغرب تايطبق الشريعة الإسلامية من الألف للياء وجاو صحاب المدونة بغاو يدخلو شي حاجة مخالفة. صباح الخير أ سي ياسين، راه القوانين الوضعية هي باش خدامة لبلاد فالأغلبية الساحقة ديال أمورها. علاش مركز نتا وصحابك اللحايا غير على الزواج والطلاق والمرأة والجنس؟ واش حيت حيط قصير؟

ثانيا شكون كلفك تهدر بإسم المغاربة كاملين وتقرر ليهم كيفاش يكونو فأمور حياتهم؟ شكون عطاك الحق تسمي الناس للي باغيين يديرو تعديلات على المدونة أنهم نشاز من سفلة المجتمع؟ شكون نتا؟

نجيو دابا للتهديد بالحرب الأهلية، بغض النظر على أن هاد الهدرة الخاوية ما عندها تا معنى، واش نتا واعي أن الدولة تقدر تتاخذ ضدك إجراءات لأنك تاتحرض على العنف وتاتدعي لحرب بين لمغاربة؟ نفرضو سمعك شي هبيل وناض خشا موس فشي خونا من صحاب التعديلات، شنو غا تقول قدام القاضي؟ علاش ما تبعتيش النصيحة ديال الرسول:إنَّ الْعَبْد لَيَتَكَلَّمُ بِالكَلِمةِ مَا يَتَبيَّنُ فيهَا يَزِلُّ بهَا إِلَى النَّارِ أبْعَدَ مِمَّا بيْنَ المشْرِقِ والمغْرِبِ.

هاد الحماس المبالغ فيه ما عندو تا معنى سوى الغيرة الانتقائية على الدين لغرض في نفسك. المعطيات كلها تاتبين أنك ما مسوقش لتطبيق الشريعة فالبلاد. غالبا بانت ليك المدونة خالقة البوز، وقلتي تا أنا ندل بدلوي فهاد البيعة وشرية.

نصيحة لوجه الإنسانية هو حاول تنتقي كلامك مزيان حيت يقدر يرجع عليك ببومزوي. النصيحة على العام فضيحة كيفما تايتقال ولكن بغيت هاد الكلام يوصل لصحابك كاملين باش يردو بالهم وما يسحابهمش هوما الممثلين الرسميين ديال المغاربة. البلاد عندها ملك وبرلمان ومجلس أعلى، ما محتاجينكمش تجيو تخ**و لينا فالحفلة.

الله يهديك!