كود هند لكلاوي كازا ////

وليد رباطي تزاد بداية السبعينات من رواد مهرجان “نوستالجيا لوڤر” اللي تختاتم ف”ڤيلودروم” فكازا اليوم الاحد 6 يوليوز 2025 بحفل “برانش”.  وليد مدير مركزي فمؤسسة فالرباط. وفي لهاد المهرجان. كيخلص 590 درهم فالسهرة “كنرجع الزمن اللي فات. هاد الفنانين ديال الثمانينات والتسعينات راه ديال الجيل ديالي. تصور اليوم كنقدر نشوف ليزيدول ديالي” يشرح وليد ل”كود”

وليد بحال عدد من كازاوا والرباطيين والمدن المجاورة لقاو راحتهم فمهرجان رجع ليهم الزمان. “راه ما تصورش اللحظات الزوينة اللي كندوزو فهاد المهرجان. مع فنانين وفنانات عشنا معاهم لحظات زوينة فحياتنا. بقينا اوفياء ليهم” يضيف صاحبنا ل”كود”. طبعا بعض المرات بحال اللي وقع ليه العام اللي فات تصدم فليدول ديالو “سمانطا فوكس” “كانت عندي ملاك وباش تفرجت فيها تصدمت. ريبات لي كاع داك الشي اللي كنت متصور. المهم تفرجت فيها” يشرح ل”كود”

“نوستالجيا لوڤر” ماشي غير سهرات. راه خرجة كاملة. وليد بحال هادوك 25 الف متفرج اللي كيتسناوهم المنظمين، كيقدرو يدوزو من الثمنية ونص حتى نص الليل لحظات زوينة. ياكلو. يشربو. يرتاحو. يشطحو…. هاد الشي على ايقاعات كلها ذكريات زوينة من الماضي القريب. من الثمانينات والتسعينات.

مؤسس هاد المهرجان ومنظمو عثمان بن عبد الجليل كان قال فالندوة الصحافية لهاد الحدث باللي هاد النسخة الثانية هدفها “تمنح “تجربة غنية وشاملة وتفاعلية بين الأجيال”. شفنا اباء وامهات جايبين اطفالهم الصغار. كيشاركوهم الايقاعات اللي كانت ومازال كتسطي هاد الاباء. راها تجربة عائلية.
هاد العام زاد المنظم “برانش نوسطالجيا”. فطور غذا كلو ايقاعات وقص. بدا اليوم مع الجوج وجمع “فنانين من إسبانيا وبورتوريكو وراقصات الفلامنكو في أجواء أندلسية حميمية وأنيقة ومتاحة لجميع الأجيال” يشرح بنعبد الجليل

مغرب اخر زوين كيجمع بين حب الثقافة والموسيقى وفن العيش. تجربة جديدة تعطات للكازاويين. اللي خلق ارتباك شوية وهو تنظيمها بنفس الوقت مع مهرجان “دجازا بلانكا” فحي القطب المالي “سي اف سي”. كان يكون قبل بسيمانا او بعد احسن