گود سبور//

أكدو نهضة بركان إصابة الحارس ديالهم منير المحمدي، لي توعت مع المنتخب الوطني المغربي وغادي يغيب لمدة مهمة على الفريق البرتقالي، وهذا الشي اللي نشرو جورنال “گود” في وقت سابق.

وحسب نهضة بركان فمنير المحمدي وبعدما تعرض للإصابة مع المنتخب المغربي خلال المعسكر الأخير، خضع لفحوصات دقيقة، ومن المرتقب يرجع يلعب مع الفريق بعد فترة تتراوح بين ثلاثة وأربع أسابيع.

وبالنسبة للحالة الصحية ديال ياسين البحيري اللي كان توعت فالفينال ديال كاس العرش ضد اولمبيك اسفي قبل حوالي شهرين، فاللاعب كان خضع لعملية جراحية ناجحة على مستوى الرباط الصليبي، وهو الآن في مرحلة الترويض والتأهيل، ضمن برنامج علاجي مكثف يهدف إلى عودته للتداريب الجماعية مع نهاية شهر دجنبر الجاي.

أما اللاعب عسال، اللي تهرس على مستوى عظم فماتش المنتخب المغربي راه استأنف التداريب الفردية على أن ينضم إلى المجموعة في غضون 10 ايام.

وبخصوص اللاعب هيثم منعوث، راه شارك في جميع مراحل التحضير والمباريات الودية، ولكن ضربو البدر وتروح مساء أمس الاربعاء، وهذا يقدر يخيله يغيب على مواجهة غدا ضد حسنية اكادير وغالبا غايكون حاضر ضد الكوكب المراكشي الثلاثاء الجاي.

وتوعت اللاعب سيدي بي على مستوى الفخذ خلال الحصة التدريبية الأخيرة، وحتى هو ما غاديش يلعب ضد حسنية اكادير في انتظار استكمال الفحوصات الطبية التي ستحدد مدة الغياب ديالو.