كود سبور//

تأهل نهضة بركان إلى ربع نهائي كأس الكونفدرالية الإفريقية، متصدرا للمجموعة الثانية من المسابقة، بعدما سالاو مرحلة المجموعات برباح كبير على ستيلينبوش الجنوب إفريقي، والفريق المغربي هو أبرز المرشحين للتتويج بهذه النسخة بالنظر للخدمة والعمل الكبير اللي داروه مكوناتو والمستوى اللي بان به تحت قيادة المدرب معين الشعباني هذا الموسم، وإضافة لقب ثالث للخزينة ديالو بعدما سبق له وربح الكأس جوج مرات عامي 2020 و2022، وكان وصيف العام الماضي.

وسالا الماتش بين نهضة بركان والضيف ديالو ستيلينبوش الجنوب إفريقي، بنتيجة 5 لزيرو لمصلحة البركانيين، وتناوب على تسجيل أهداف الفريق البرتقالي كل من أسامة المليوي فالدقيقة 7، ويوسف ميهري فالدقيقة 15، وباول باسيني فالدقيقة 66، ويوسف الزغودي فالدقيقة 79، ورجع بول باسيني ماركا الهدف الخامس فالدقيقة 84.

نهضة بركان سالا مرحلة المجموعات متصدر الگروب 2 برصيد 16 نقطة، وهو أعلى رصيد في مرحلة المجموعات، بين كل الفرق المشاركة في كأس الكونفدرالية الإفريقية هذا الموسم بـ5 الرباحات وتعادل واحد وبلا خسران ، وجا وراه فالمركز الثاني فنفس المجموعة ستيلينبوش الجنوب إفريقي، برصيد 9 نقاط، وغايلعب أمام النادي القسنطيني الجزائري او أسيك ميموزا الإيفواري، او المصري البورسعيدي.