كود الرباط//

علمت “كود” من مصدر مطلع أن عدد من “مسامير” الميدة في المؤسسات المنتخبة بإقليم تازة، ومنهم طبعة “العجزة” ومحترفي الترحال السياسي والحزبي، دايرين ضغوط كبيرة على قيادة عدد من الأحزاب باش يحافظو على نفس التزكيات ف الاستحقاقات الانتخابية المقبلة.

“شيوخ السياسة” بتازة وتاهلة وغيرها من المناطق المجاورة، باغي يردو هاد الإقليم حكر على فئة من “للي سالاو سياسيا وتجاوزهم هاد الجيل الجديد”، ويقطعو طريق على أي شاب أو شابة باغين يقتحمو السياسة والثقافة والفن.

وفهاد السياق، كشفت مصادر حزبية بالإقليم لـ”كود”، بأن دخول عمر خياري، واحد من الجيل الجديد للساحة وبدا يشتغل، فجميع المجالات من الرياضة للثقافة للفن والتراث، زعزع كبار المنتخبين للي مولفين “العراضات” والزرود ف كل مناسبة انتخابية باش يطلعو رؤساء جماعات أو برلمانيين.

هاد الشيوخ دايرين حملة كبيرة على الخياري، ماشي حيث غير شاب، لا، وماشي حيث فايتهم فالخدمة والإنجازات فالميدان، لا.. بل لأنه كيفهم حاجيات الإقليم ومشا نيشان للتيران وفهم شنو خاص تازة وتاهلة.

خياري كيمثل جيل جديد بإقليم تازة ونواحيها، قافز وباغي يغربل المنطقة سياسيا وتنمويا، بروح الشباب لي ساكناه، وهو من أحفاد “حدو الخياري” واحد من كبار رجالات المنطقة.

إنقاذ فريق قدس تازة وتأهيله رياضيا ولوجستيكيا، هي البداية اللي خربقات “شيوخ السياسة” والأحزاب التقليدية فالمنطقة خصوصا حزب الاستقلال، للي باغي يحكم المنطقة بالقوالب (كيف دار مع الاغلبية فاش دار ميسا ودا رئاسة الجماعة في خرق تام لاتفاق أحزاب الأغلبية).

من الكورة صنع الخياري مجد جديد لتازة، كولشي تايق فيه، خصوصا من الشباب ورجال اعمال ومسؤولين عياو من “الكذوب” ونفاق بعض السياسيين، وباغين شاب عندو تجربة ف مجال الكرة خصوصا أنه كيشتغل فالجامعة الملكية لكرة القدم، وعندو حب كبير للمنطقة، وغيور على الفرقة لي رجع ليه شويا الروح، بعدما كانت “مجلية” وسط القهاوي، وبلا ترونسبور لسنوات.

من العجائب أن المنتخبين المحليين والبرلمانيين ديال الإقليم مقدروش يجيبو حتى طوبيس للفريق، المهدد بالسقوط، لدرجة أن اللاعبين كيمشيو ف طاكسيات كبار ويتنقلو من طاكسي لطاكسي باش يلعبو الماتش ف أي منطقة أو مدينة تكون قريبة أو بعيدة. فرقة معندها لا تيران ولا مركز تدريب ولا نقل ولا فلوس. دبا بدات تحرك مع الخياري.

ماشي غير هادي هي الفضيحة، للي شاف تازة غايقول غزة حسن منها ف البنيات التحتية والطرقان وكولشي. لا فنادق ولا طرق مقادة، وتهميش كبير للشباب مع نخبة “مقابلة الريع” والامتيازات وثقالين على القلب وحتى فالخدمة (عيانين بزاف) يقول مصدر “كود”.

تازة خصها تولي حسن من غزة (طبعا كنهضرو على غزة كيف كانت قبل الحرب)، لذلك خصها دينامو قافز، قادر يحرك المياه الراكدة. دبا شفنا نماذج سياسيين شباب كيتحركو ويخدمو ويشتغلو، منهم نساء شابات نجحو ف تدبير جماعات ترابية صعيبة ومنهم للي ولاو وزراء (السعدي وبنسعيد). لذلك تازة خاصها بحال الخياري.

وغير بجمعية “المستقل” الصغيرة وبإمكانية قليلة، دار الخياري ثورة رياضية وثقافية ف الاقليم بتازة وتاهلة والمناطق المحيطة بها، منذ انطلاق أنشطتها سنة 2023، بحيث خدمات على إدماج فئة الشباب خارج التعليم والتكوين والعمل (NEET)، من خلال مقاربة متعددة الأبعاد تشمل التكوين، الثقافة، الصحة، الرياضة والتضامن الاجتماعي.

أول حاجة دارتها الجمعية ف إدماج هؤلاء الشباب هو تنظيم ورشات تكوينية في اللغات، المهارات الذاتية، ريادة الأعمال، الإعلام الرقمي، التسويق، الحكومة المنفتحة، ومهارات البحث عن عمل.  كما أطلقت برامج دعم نفسي وورشات استماع لفهم تطلعات هذه الفئة.

ف حصيلة أولية، دارت الجمعية 8 زيارات ميدانية رئيسية بين يناير ويوليوز 2024، شملت تقديم تجهيزات ودعم رياضي: توزيع دفعتين من المعدات الرياضية على نادي اتحاد تاهلة لألعاب القوى (المنطقة معروفة بألعاب القوى)، وتوفير ملابس وتجهيزات لفريق كرة القدم للفئات السنية  (U16، U17، U19)).

وشاركت جمعية الخياري في تنظيم سباق تاهلة (بشراكة مع الجامعة الملكية لألعاب القوى).

ومن الأمور اللي حركها الخياري، هو تنظيم قافلة طبية كبرى لجراحة المياه البيضاء (الجلالة) استفاد منها أزيد من 100 شخص، فحوصات ضعف البصر لأكثر من 200 تلميذ بالزراردة، مع توزيع 100 نظارة طبية مجانًا، وقافلة طبية جديدة شهر يونيو شملت الكشف عن النظر والتوعية الصحية.

وفجانب دعم التمدرس والأنشطة الثقافية، تم تجهيز مكتبة جمعية دار الفتاة بكتب، وتوفير حاسوب دعما للتحصيل، وإطلاق ورشة حول التراث الثقافي المحلي بمشاركة مسؤولين من وزارة الثقافة، مع تقديم دروس دعم وورشات تعليمية وفنية للأطفال في المدارس.

ومن الأمور الإ   يجابية هو الفن، لأول مرة فرق موسيقية فلكورية كانت مهمشة لسنوات، استطاع الخياري يجمعهم ويدير ليهم تنظيم باش حصلو على بطاقة الفنان، مقداتهمش فرحة. وهما سنوات عاشوا التهميش. هاد الفرقة الفلكورية بحال أحيدوس فن المنطقة ولى دبا عندو شان وهمة عند المسؤولين.

وكذلك بالنسبة للزرابي، هاد الصناعة التقليدية لي كانت مهددة بالانقراض، غايولي عندها فيستيفال ويكونو مسابقات ومبيعات باش ينتعشو الصناع التقليديين، بشراكات كيوجدهم الخياري مع كتابة الدولة فالصناعة التقليدية ووزارة الثقافة ومجلس جهة فاس مكناس.

المرا حاضرة كذلك، بحيث كرمت الجمعية بمناسبة اليوم العالمي للمرأة نساءً ساهمن في خدمة المجتمع المحلي. كما قامت بتكريم البطلة شيماء المنيعي، التي أحرزت ذهبية سباق 600 متر في البطولة المدرسية الوطنية، مؤكدة التزامها بدعم الموهوبين والطاقات النسائية الشابة.

دبا كيتوجد مهرجان للراب بتازة، سابقة، من نوعها فالمغرب، خصوصا وأن الراب كان محصور ديما على كازا والرباط. هاد الهيت خصو يخرج من المركز ويوصل لتازة وباقي المناطق.