كود – وكالات //

فـ5 أكتوبر 1789، وفوسط أجواء الثورة الفرنسية، خرجو آلاف العيالات من باريس ومشاو فمسيرة لقصر فرساي، بعدما وصلات ليهم لعضم بسبب الخصاص فـالخبز والغلا.

المؤرخين كيقولو بلي المطالب المعيشية كانت هي الشرارة المباشرة، ولكن كانت حتى دوافع سياسية حاضرة بقوة,المشاركات كانو باغين يضغطو على الملك لويس السادس عشر باش يعترف بالمراسيم اللي صادقات عليها الجمعية الوطنية التأسيسية، وباش يبعدوه على الدوائر المحافظة اللي كانت محيطة بيه ففرساي.

النقص فـالخبز كان فعلا من الأسباب الرئيسية اللي خرجات الناس للشارع، ولكن اختزال المسيرة كاملة فالجوع بوحدو ماشي دقيق حيث باريس كانت عايشة ازمة سياسية كبيرة، وكان كلشي كاعي على الطبقة الحاكمة.

ومن بين الحوايج اللي زادت سخنات الطرح، الزردة الغالية لي نظمها الضباط فالـ1 أكتوبر، واللي تقال أن بعض الضباط دازو برجليهم على الشارات ديال الألوان الثلاثة، اللي ولات رمز للثورة الفرنسية.

حتى الرجال انضمو للمسيرة، ومن بينهم مسلحين وثوار معروفين، بحال ستانيسلاس مايّار، اللي كان من المشاركين فاقتحام سجن الباستيل.

أما القصة الشهيرة اللي كتقول بلي الملكة ماري أنطوانيت قالت: “إلا ماكانش عندهم الخبز، يخليهم ياكلو الكعك”، كيعتبرها المؤرخين أسطورة وماعندهاش أساس تاريخي مؤكد.

هاد العبارة تنسبات لأول مرة لـ”أميرة عظيمة” فكتاب “الاعترافات” ديال جان جاك روسو، اللي تكتب فـ1765 وتنشر فـ1782، يعني قبل ما توصل ماري أنطوانيت أصلا لفرنسا.

الربط بين هاد العبارة والملكة ما بان حتى فالقرن التاسع عشر، فإطار الصورة السلبية اللي ترسمات عليها من بعد الثورة،وبالتالي، ماكاين حتى دليل بأنها قالت هاد الكلام فمسيرة العيالات نحو فرساي.

فداك النهار، تجمعات بين 7 آلاف و8 آلاف سيدة مني مشاو قصدو قصر فرساي وفيهم كان لي مسلح  وكاين روايات كتقول بلي جابو معاهم حتى جوج ديال المدافع.

قبل ما توصل الحيحة للملك، وقع صدام بين واحد الملازم فالحرس الملكي ومجموعة ديال العيالات اللي كانو باغين يواجهو الملك.

ومع ديك 11 ديال الليل، بدا لويس السادس عشر وماري أنطوانيت كيدرسو  إمكانية الهروب لورماندي، ولكن الحرس الوطني اعترض العربات قبل ما توصل للقصر.

وفالصباح الملك لويس السادس عشر والعائلة المالكة يوافقو على مغادرة فرساي والتوجه لباريس.

هاد اللحظة كانت حاسمة، حيث ولى الملك عمليا تحت ضغط الجماهير الباريسية، وما بقاش عندو نفس الاستقلالية اللي كان كيمارس بها السلطة من قبل.

من بعد انتقال الملك والعائلة المالكة لباريس، ما بقاتش فرساي هي المركز السياسي ديال البلاد. ولى الملك قريب بشكل مباشر من الجماهير الباريسية ومن الجمعية الوطنية التأسيسية، وولات قراراتو مرتبطة بشكل أكبر بالضغط السياسي والشعبي.

عدد من المؤرخين كيعتابرو هاد اللحظة بداية الانهيار الفعلي للملكية المطلقة، حيث السلطة ديال الملك، اللي كانت شبه مطلقة، ولات مزيرة بشكل كبير.

فالأخير، مسيرة العيالات لفرساي ماكانتـش غير احتجاج على الخبز ولكن كانت لحظة قلبات موازين القوة، وبيّنات أن أزمة معيشية، إلا تلاقت مع أزمة سياسية، تقدر تتحول بسرعة لاحتجاج جماهيري قادر يغيّر مسار دولة كاملة.