محمد سقراط-كود///

هادي مدة  وكيتلاحو تصاور او فيديوات ديال مغربيات مزوجين أجانب من شي دول قليل لي سمع بيها، والصراحة راه ظاهرة عجيبة معرفتش واش حتى  الرجال المغاربة قدروا يتسوعوا في العالم بهاد الطريقة أو الأمر حكر على المغربيات، ولكن حاليا لي كثار في مواقع التواصل الاجتماعي هوما تصاور المغربيات مزوجين بأجانب، وديما فين مكتحط شي صورة كينوض نقاش كبير حول واش المغربية بصح أم شنطة أو المغربي لي فيه شي خلل وماجايبش روحو بحالها برا المغرب.

بالنسبة ليا اكثر حاجة مدمرة في أي علاقة بين جوج مغاربة هو علاقتهم بالأم ديالهم، بزاف ديال الرجال مغاربة لم تفطمهم أمهاتهم لحد الآن، كيكبرو ويتزوجو ويديرو الولاد وهوما باقين ولاد مهم، وبالنسبة ليا علاقة المغربي بالأم ديالو مرضية وغير سوية وحتى داك كثرة التقديس غير مبررةً، مادام أن اغلب النساء المغربيات في الأجيال لي قبل منا ماقارياتش وغير متمدنات، وحتى لي ساكنات في المدينة زعمة راه غير في احياء هامشية وشعبية ا لبادية حسن منها واكثر رحمة، نقدر نفهم تقديس الألماني من بعد الحرب للأم ديالو، أو الياباني او الغربي عموما، الرجال ماتوا في الحرب بقاو غير العيالات وخرجوا خدموا وتكرفصوا وقراو وخلاو المصانع مفتوحة، ونقاو بلادهم من مخلفات الحرب، اما حنا مثلا بنادم مو من نهار تزاد وهي غير كتشقى في الدار وكتطيب الدواز والخبز والحريرة والكسكسو ولابسة طابلية وفيها ريحة الطياب والجافيل، شنو الحاجة لي تستاهل هاد التقديس ديال المغربي للأم ديالو، ولي فاش كيبدى يقلب على زوجة كيقلب على نسخة منها.

واحد التعليق كان كتبانوا واحد البنت قالت انه فاش كتزوج المغربي كتزوج حتى مو وختو وخالتو وعائلتو، وهادشي في الواقع راه حتى في الجهة لخرى حتى فاش كتزوج البنت هنا راه كتزوج مها وختها وعائلتها، وكنعرف حالات قريبة ديال نسيبات تسببوا في طلاق بناتهم غيرة او حسد وباقي الامراض النفسية والاجتماعية لي كيغلي بيها بنادم عندنا، لدرجة يقدر يكون الزواج بين مساخط الوالدين هو انجح زواج في المغرب، طبعا هادشي فيه مبالغة ولكن  تكوين الانسان المستقل الفرداني راه معندناش في المجتمع ديالنا، الدري ولد مو وباه واخا يدير ستين عام، بنادم بكل فخر كيقوليك ان الى ماتشاورش مع مي منديرش هاد الحاجة، حتى كتولي تخايل مو هي انجيلا ميركل وهي غير مرة بسيطة من جابها باه من الدوار، راه عادي يكون عاد سوء الفهم بين المغاربة نساء ورجال وعادي يكونوا الزواجات المختلطة كثيرة وفي مناطق نائية، هاد اليوماين شفت بنت تزوجات في تركيا من واحد الدوار تم بلا ماتشوف حتى الراجل فقط سبقوها جوج مغربيات مزوجات تم ودبرو ليها في راجل ووافقات ومشات، هادشي كامل هروب من الزواج بواحد ولد مو.