كود الرباط//

مباشرة بعد البلاغ ديال الديوان الملكي اللي جا بعد اجتماع المجلس الوزاري، واللي تم فيه الاعلان على رفع ميزانية قطاعي التعليم والصحة إلى 140 مليار درهم، وإحداث أزيد من 27 ألف منصب شغل جديد ابتداء من سنة 2026، عمّت موجة فرح كبيرة وسط غرفة النقاشات ديال “جيل زيد” على تطبيق ديسكورد.

داخل غرفة النقاش العامة “#general-chat”، تفاعل المئات من الشباب مع البلاغ ديال الديوان الملكي الملكي اللي شافوه إشارة إيجابية واستجابة مباشرة لمطالبهم اللي رفعوها طيلة الأسابيع الأخيرة.
شباب كيبان عليهم الوعي السياسي قالو إن “الملك جاوبنا برفع الميزانية للصحة والتعليم”، وآخرين اعتبروا أن “المجلس الوزاري عطانا أمل جديد فالإصلاح”.
الرسائل كانت مزيج ما بين الفخر، التفاؤل، وحتى الدعوة إلى تجاوز لغة الشارع والدخول للسياسة.

واحد من المشاركين كتب: “بسبب ضغط الشارع تحقق جزء بسيط وغير كافي، ولكن راه بداية زوينة”.
آخر زاد: “خاصنا نحولو هاد التفاعل إلى مشاركة سياسية حقيقية، ماشي غير فديسكورد”.

بلاغ الديوان الملكي: تحفيز الشباب على المشاركة السياسية

وجاء فبلاغ الديوان الملكي أن ان المجلس الوزاري وافق مشروع قانون تنظيمي كيتوخى تشجيع الشباب اللي ما فوقهمش 35 سنة على دخول الحقل السياسي، من خلال مراجعة شروط الترشح وتبسيطها، سواء بتزكية حزبية أو بدونها، مع تحفيزات مالية تغطي 75٪ من مصاريف الحملات الانتخابية.
البلاغ زاد وأكد على تخصيص الدوائر الجهوية للنساء باش يتعزز حضورهن داخل البرلمان.

هاد المعطى دار تفاعل قوي وسط شباب “جيل زيد”، اللي شافو فيه “إشارة مباشرة ليهم”، واحد كتب: “هادي أول مرة كنحسو أن الدولة باغانا نشارك فعلاً، ماشي غير نحتجو”.

من الاحتجاج إلى المشاركة: وعي جديد عند الشباب

هاد النقاشات كتأكد أن جيل الاحتجاج الرقمي جيل واعٍ بالمسؤولية السياسية.
التفاعل داخل ديسكورد بيّن أن جزء من الشباب ما بقاش كيشوف السياسة مجال بعيد، بل كيعتبرو الانتخابات وسيلة لتغيير فعلي، خصوصاً مع الخطوة الجديدة ديال تحفيز المترشحين الشباب.

أحد المعلقين كتب: “الطريق مازال طويلة، ولكن اليوم كاين تجاوب حقيقي، والمطلوب هو نكونو حاضرين فالميدان”.