الرئيسية > آش واقع > نقابة كاعية بسباب وضعية أطر التلقيح فالقصيبة: مكرفصين والخدمة كثيرة عليهم
24/02/2021 18:20 آش واقع

نقابة كاعية بسباب وضعية أطر التلقيح فالقصيبة: مكرفصين والخدمة كثيرة عليهم

نقابة كاعية بسباب وضعية أطر التلقيح فالقصيبة: مكرفصين والخدمة كثيرة عليهم

كود كازا//

عبرات الجامعة الوطنية للصحة المنضوية تحت لواء الاتحاد المغربي للشغل – فرع ببني ملال، على قلقها بسباب وضعية الأطر الصحية المكلفين بالتلقيح ضد فيروس كورونا المستجد ف”مركز التلقيح القصيبة”، بحيث قالت انهم كيعانيو من مشاكل كثيرة، اولها انهم قلال والخدمة كثيرة عليهم.

وقالت النقابة، فمراسلة موجهة لمندوب الصحة فبني ملال، أنه على الرغم من انخراطهم فهذ الحملة، فهوما ماخداوش الدعم الكافي لإنجاح هذ المحطة، نظرا لانه كاين نقص كبير فالموارد البشرية المكلفة، وعدد الناس اللي كيجيو يتلقحو كبير فالمقابل.

وشرحات الجامعة ان المكلفين هوما 4 دالفراملية فقط، جوج مكلفين باللوائح وجوج بالتلقيح، فيحين أن الكثافة السكانية ديال القصيبة واصلة ل15 الف نسمة، والعشرات كيجيو يتلقحو.

وقالت النقابة ان الأطر الصحية كيخدمو من 8 دالصباح حتى لل5، وبشكل يومي، وهذشي مايمكنش يستمرو عليه بهذ الوثيرة، خصوص أن كاين فيهم اللي كتجيه نوبات انهيار خلال العمل.

وكالبات الحامعة بالتدخل العاجل وإيجاد حلول لهذ الناس، وتوفير ظروف العمل المناسبة.

 

موضوعات أخرى