سعاد زرار كود ///

حسن الفد مبدع. مبدع بصاح. حقاش مبدع مختلف. كاي مبدع كيدافع على تصورو للحياة تصورو للفن بلا ما يتسوق لحد. عندو هم خاصة فالعيش المشترك. عندو تصور على كيفاش يكون هاد العيش. شفناه فخرجتو الاخيرة مع شهرزاد عكرود ف”احك يا شهرزاد” اللي تم بثو ف”دوزيم”. الفذ هدر على جانب دافع عليه هادي كثر من عشرين عام تقريبا. يتعلق بالتحضر او التمدن. يكون عندك اخلاق باش تقدر دير العيش المشترك فمدينة ففضاء. الفذ جبد مثال على مرا راكبة على طونوبيلة باكثر من مائة مليون ووقفات فالشارع باش تماكي. الماكياج اهم من كلشي. اللي كيعرف الفذ غيعرف انو غادي ينزل ليها وما يتسوق لحد.

الفذ اعتابر هاد السلوك ديال “هرگاوا”. كيقصد ماشي ناس لعروبية كيف كيفسروه شي بيضاوا =اي سكان المدن=. هنا كيقصد تصرفات غير متحضرة غير متمدنة. اجيو نديرو قياس فمدينة بحال كازا على هاد السلوكات او التصرفات. ويمكن نوسعوها فمدن وعروبيات المغرب.

غالبية صحاب الطاكسيات فكازا غاديين يدخلو لهاد الخانة ديال هركاوا. علاش؟ ما كيوقفوش فالضو لحمر. ما كيماركيوش سطوب. ما كيديروش السمطة واخا عارفينها لحمايتهم وحماية حياتهم. كيركبو فطاكسي صغير اكثر من كليان بلا اذن. كاين فيهم اللي كينزل فشي زنقة وعندنا ف”كود” تصاور٬ باش يبول. بلا ما نهدرو على الطاكسيات لكبار. تماك نسبة هرواكة كيترتافع. صحاب الطونوبيلات غالبيتهم كيتصرفو تصرفات كتخليهم قراب من هرگاوا. فكازا وعدد من مدن المغرب قليل اللي كيوقف فممر الراجلين. قليل اللي قادر يتحكم فراسو ما كيكلاكسونيش. الغالبية يدها على لكلاكسون

صحاب لماطر والبشكليطات عدد قليل حتى هو اللي كيعتارف بقانون السير. كيدوزو فممرات تحتية واخا ممنوع عليهم. هاد الفوضى ديال عدم احترام قانون السير كلشي منخارط فيها. كاميوات. طوبيسات. كيران…..

الراجلين حتى هما غالبتهم هركاوا. حقاش ما كيوقفوش باش يكون الضو لحمر شاعل. حقاش كيدوزو وسط الشارع عوض ممر الراجلين. حقاش يقدرو يلوحو الزبل باش يتنزهو حدا جامع الحسن الثاني او فعين السبع او فغابة بوسكورة او فسيدي مسعود.

لمدينة دايرة تقصير وبزاف. تصرفات هركاوا كتحمل فيها الدولة =وداخل فيها حتى المنتخبين= دور. ما موجدينش الظروف باش يفرضو على البيضاوي ما يبقاش هركاوي.
هرگاوا كمقابل للمتمدن عددهم كبير وكيمثلو الغالبية حتى فالعمارات والاحياء اللي فيها الملكية المشتركة وحتى صحاب الفيلات والديور الخاصة. فالملكية المشتركة كيبان سلوكهم باش ما كيخلصوش السانديك. كيفما كان ثمن المتر المربع: 3 الاف درهم و30 الف درهم. غالبا تلقى نسبة قليلة اللي كيتخلص السانديك. حتى فالگاراج تلقى الهرگاوي اللي يقدر يكون مدير كبير فشركة كياخد بلاصتو وبلاصة جارو فالكاراج واخا ما كيخلصش السانديك. كاين شي اقامات ثمن المتر المربع فايت 25 الف درهم ويالله 11 فالمائة من سكان الاقامة للي كيخلص السانديك. يعني كاين فيها 89 بالمائة من هرگاوا. تلقى عندهم كلاب كيخرجوها وما كيجموش زبلهم باش تقضي لكلاب حاجتها فالزنقة وكيقريو ولادهم فمدارس غالية ولكن كتبقى تصرفاتهم غير متمدنة.

حسن الفذ بدا بكري حربو ضد اللا تمدن. راه كان يمكن اول بيضاوي نبه لواحد الامر خطير وما سمع منو حد وهو الطروطوار العالي بزاف علي المواطن. هدر بزاف على منع المواطن البيضاوي باش يتمشى فشوارعو وازقتو بلا ما تكون شي طونوبيلة مستاسيونا…

دابا اش الحل باش يترباو هادو. القانون. فكازا او غيرها خاص يكونو الكاميرات فاي بلاصة. خاص السرعة تتحدد ف30 كلمتر فالساعة وسط جميع المدن. خاص لپيرمي ما يبقاش مدى الحياة بل يعاودو المواطن اللي كيدير 5 مخالفات فالسير. خاص هاد الكاميرات تنشر الفيديوات فقناة علي يوتوب =ماشي بالضرورة يكون الوجه باين= ووليو هادو فرجة لكل لمغاربة. هادا هو اللي ممكن يقلل من عدد هرگاوا فمدننا.