الوالي الزاز -كود- العيون///
حجزات جبهة البوليساريو كميات كبيرة ديال الأقراص المهلوسة اللي جاية من الجزائر قصد الترويج فمخيمات تندوف.
وحجزات البوليساريو ما مجموعه 2400 قرص مهلوس كانت مخبية فبناية متهالكة معزولة على مستوى ما يسمى “ولاية العيون” بفضل تبليغات ديال الساكنة.
ولقات البوليساريو راسها مجبرة على التحرك لحجز الكمية الكبيرة ديال الأقراص المهلوسة، لاسيما بعد جريمة القتل الأخيرة اللي راح ضحيتها عشريني تعرض لطعنات على مستوى الصدر والرأس.
ولم توقف جبهة البوليساريو المسؤولين عن شحنة الأقراص المهلوسة اللي جاية من الجزائر، الشي اللي طرح العديد من علامات الاستفهام حول تسترها على الفاعلين الرئيسيين.
ويشار أن مخيمات تندوف شهدات فالأشهر الأخيرة غزو كبير ديال الأقراص المهلوسة القادمة من الجزائر ونشاط كبير ديال عصابات التهريب التي يتستر عليها نظام العسكر وعاطيها حرية الولوج لمخيمات تندوف.
