الوالي الزاز -كود- العيون///

[email protected]

حاول وزير خارجية الجزائر، أحمد عطاف، فحوارو اللي دار مع خديجة بن قنة، يلقا تخريجة باش يلوح اللوم على المملكة المغربية فقضية الزلزال اللي ضرب منطقة الحوز.

وإدعى أحمد عطاف فحوارو أن وزير الشؤون الخارجية والتعاون الأفريقي والمغاربة المقيمين في الخارج، ناصر بوريطة رفض يرد على مكالماتو الهاتفية بعد الزلزال باش يقدم ليه التعازي فالضحايا.

وأضاف أحمد عطاف فيما يخص المساعدات الجزائرية، أن المملكة المغربية رفضات تقبل المساعدات اللي عرض نظام العسكر، مضيفا أن بلادو كانت من أوائل الدول اللي عرضات المساعدات ولكن المغرب رفضها.

الهدرة ديال عطاف الغرض منها هو إلقاء اللوم على المغرب وتحميلو المسؤولية والركوب على الموجة، فوقت حاول فيها نظام العسكر يدير مسرحية كبيرة وعرضها على التلفزيون باش يضغط على المغرب.

المملكة المغربية عرضات شحال من مرة المساعدات على الجزائر ورفضها نظام العسكر وخاصة فقضية الحرائق وبلا ما يدير تصاور ولا مسرحية، وتجاوز هادشي گاع لعرض بناء العلاقات ورفضها العسكر أيضا، وهادشي كيبين شكون لي يدو ممدودة.

المغرب ما رفضش مساعدات الجزائر بوحدها، المغرب رفض أيضا، مساعدات ميريكان براسها وهادشي راجع لكون المغرب ركز على استقبال المساعدات والوسائل اللي محتاج فقط.