الرئيسية > آراء > نصائح حباس خصيم. قرار بناء 14 الحبس هو قرار جد جريئ ومهم فهاد المرحلة ولكن كنتمنى يكونوا حباسات ماشي أوطيلات كيما هوما دابا
01/11/2015 09:08 آراء

نصائح حباس خصيم. قرار بناء 14 الحبس هو قرار جد جريئ ومهم فهاد المرحلة ولكن كنتمنى يكونوا حباسات ماشي أوطيلات كيما هوما دابا

نصائح حباس خصيم. قرار بناء 14 الحبس هو قرار جد جريئ ومهم فهاد المرحلة ولكن كنتمنى يكونوا حباسات ماشي أوطيلات كيما هوما دابا

محمد سقراط كود /////

خبر بناء 14 الحبس جديد فالمغرب بمواصفات عالية، كان حقا بالنسبة ليا خبر مفرح وكيبعث أمل بلي أن هاد البلاد ربما يجي شي نهار وتولي قابلة للعيش الآدمي فيها كلها وماشي بعض منها، وتولي ملي تخرج تحس بالأمان ، الأمان لي مكتحسش بيه فهاد البلاد واخا تكون خارج فدبابة وهادشي فمراكز المدن أما الأحياء الشعبية والهامشية فهي مناطق سوداء البوليس براسهم مكيدخلوش لبعض منها غي بزز.

ولكن شناهي هاد المواصفات العالية أو العالمية، واش زعمة غادي يولي حقا الحبس مكان للعقوبة أو غادا تزيد تتحسن فيه شروط الحياة وتخليه بالنسبة للعديد حسن من السيفيل، حيث بالنسبة ليا وللعديد كفس مني الحبس حاليا ماشي مكان للعقوبة لعكس بل هو مكان لدراسة الإجرام، فيه كتقرى فيه كتحربن وكتولي مجرم حقيقي، واش لي دخل للحبس ملي كيخرج كيولي يخاف يرجعليه طبعا لا، لعكس المرة التانية كيجيب مونتيف طول من اللول، وأنا ملي كنت فيه كانوا عدة حالات ديال ناس دوزو عقوبة طويلة على رويحة وخرجو ورجعوا بالزربة على رويحة خرى، وهادو ماشي حالات نادرة أو قليلة بزاف ولكن موجودة بنادم مدوز الرويحة اللولة والتانية، وعلى أتفه الأسباب، علاش حيث فالحبس كيحس براسو حر كثر من برا، وهاد الإحساس صعيب تحس بيه فالحبس كيما هو متعارف عليه وللسبب لاش دار، ولكن فالمغرب كتحس بصح أنك حر كثر من برا.

أول حاجة خاص تتحيد القفة ديال الزيارة، حيث راها كتساهم بزاف فأنها تقلل من قسوة العقوبة حيث نتا فالحبس خاص الإدارة تتحكم فآش تاكل وآش تشرب وفوقاش ماشي تاكل لي بغيتي وآش تشهيتيو فالغالب تاكل ماكلة مالقاهاش حتى داك الموظف لي حاضيك، زيد عليها العديد من الأشياء الأخرى لي كتدخل معاها من ملبس وغطى، بنادم مدوز المونتيف لابس سيرفيط ديال لاكوسط الثمن ديالو كثر من صالير الموظف، فيناهي العقوبة هنا واش هي تسد على شي حد بالساروت بين ربعة ديال لحيوطة هادي ساهلة وغادي يولفها دغية مادام متحرمش من نمط العيش ديالو من مأكل وملبس وداكشي، ومغطي ومفرش غي المازافيلات ديال برا، وتقولي كيتعاقب راه كيما كيقولوا الحباسة كيديرو فينا خير كيشدونا غي نتهلاو فصحتنا شوية ونتنقاو ونرتاحو من الجهاد ضد راسنا برا.
تاني حاجة خاص مايبقاوش الشنابر كبار، شانبر فيه 140 واحد ( كاين فمراكش)، هادا راه سوق ماشي حبس، واش وسط 140 واحد راه غي المضاربة على الطواليط كتدوز النهار دغية، نتا فالحبس العقوبة هي انعدام أنشطة لي تقتل بيها الوقت خاص تبقى كالس وكتقتل فالوقت وتحس بيه تانية بتانية، أما فهاد لحباسات عندنا مابين شحر البراد ونصب الكاميلة وشد النوبة على الطواليط والتيليفون ها النهار داز، بالإظافة الى الإنظباط المفرط والخضوع والإلتزام والعقوبات القسوى والمشددة داخل السجن مع السماح بإنتهاك حقوق الإنسان لأنها مكتعنيناش مادامنا لم نصل الى الإنسانية الحقة.

مثلا بحاد هادوك الجوج لي فصلو جوج سياح ألمان ففاس، واحد ركبتو العضم كايبان ولاخر وجهو وكرشو، بحال الى كانوا فشي حرب ضد أتيلا، زيد عليها الخلعة والتبعات النفسية من بعد، بحال هادوك الجوج واش عتقوليا خاص تراعي انسانيتهم وتعاملهم معاملة كتحتارم كرامتهم وداكشي، وواش الحبس فصيغته المغربية كافي لبحال هادوك طبعا لا، طبعا أنك تديه للحبس وتبقى ختو تغني يا سلامي عليكم يا سعودية وتجيبليه راه عقوبة غير عادلة نظرا للمجزرة لي ارتاكبوها فحق سياج أجانب مسالمين يستقبلونا اخوتنا الاجئين المغاربة بالألاف فألمانيا، لذا قرار بناء 14 الحبس هو قرار جد جريئ ومهم فهاد المرحلة ولكن كنتمنى يكونوا حباسات ماشي أوطيلات كيما هوما دابا.

موضوعات أخرى