الرئيسية > آش واقع > نشرة كورونا النصف شهرية: الوفيات مازال طالعة واغلبها فكازا
11/05/2021 20:30 آش واقع

نشرة كورونا النصف شهرية: الوفيات مازال طالعة واغلبها فكازا

نشرة كورونا النصف شهرية: الوفيات مازال طالعة واغلبها فكازا

كود كازا//

فالفترة الممتدة ما بين 26 أبريل حتى ل10 ماي 2021، عرف المغرب انخفاض فعدد الحالات الجديدة والحالات النشطة، لكن فالمقابل عرفنا ارتفاع فنسبة الوفيات، اللي النسبة الاكبر منها كتسجل فكازا.

أما بخصوص المنحى الوبائي الأسبوعي، قال عبد الكريم مزيان بلفقيه، رئيس قسم الأمراض السارية فوزارة الصحة، أننا سجلنا انخفاض ب19,5 فالمية هذ السيمانة بالمقارنة مع السيمانة لي فاتت، بحيث سجلنا  هذ الأسبوع 2008 إصابة.

وجميع المناطق فالمغرب تقريبا فيها أقل من 20 كمعدل للإصابة بشكل أسبوعي 100 ألف نسمة، باستثناء إقليم العيون اللي واصل فيها المعدل بين 20 و50.

وبالنسبة لمنحى الوفيات، فسجلنا ارتفاع ديال 22,2 فالمية، بحيث ماتو هذ السيمانة 44.

بالنسبة لعدد الوفيات حسب الجهات، كتجي جهة كازا سطات فالمقدمة ب25 وفاة، بعدها مراكش آسفي وطنجة تطوان وبني ملال خنيفرة ب3 وفيات فكل وحدة فيهم.

أما معدل الإصابة الأسبوعي لكل 100 ألف نسمة، فحقق انخفاض ل5,5, فالاسبوع الأخير، بينما كان محدد ف6,9 فالسيمانة اللي قبل.

وتسجل انخفاض فعدد المرضى اللي كاينين فأقسام الإنعاش، بحيث فالسيمانة اللخرة، هبطنا من 349 حالة ل279 حالة، بينما تحدد عدد الناس اللي كيديرو التنفس الاصطناعي الاختراقي ف17 لمصاب.

وبخصوص مؤشر توالد الحالات على الصعيد الوطني، فطلع ل0,90 الاحد 9 ماي، وكان فالاحد اللي قبل محدد ف0,81.


بالنسبة لإيجابية التحاليل، فكازا فهذ السيمانة اللخرة كتجي فالرتبة الأولى ب10,19 فالمية ديال الإيجابية، كتجي بعدها جهة سوس ماسة ب6,86، ثم جهة العيون الساقية الحمرا ب6,08.

وبالنسبة لترتيب المغرب عالميا، أكدات وزارة الصحة فنشرتها أن المغرب نزل مركز واحد فعدد الوفيات، وصبح كيحتل المركز 44، بينما بقا فالمركز 41 فالإصابات والمركز 48 فعدد الكشفات.

أما على المستوى الإفريقي فترتيب المغرب ماتغيرش كَاع، بحيث بقى فالمركز 2 فالإصابات والكشفات، والمركز 4 فالوفيات.

موضوعات أخرى

13/06/2021 20:00

“لارام” بدات تنزيل تعليمات الملك بخصوص تسهيل عودة مغاربة الخارج بأثمنة مناسبة.. طلقات عملية استثنائية خصصات ليها 3 ملايين مقعد