كود كازا//

دازت اليوم الخميس بغرفة الجنايات بمحكمة الاستئناف بالدار البيضاء، جلسة جديدة من جلسات محاكمة الرئيس الأسبق للوداد الرياضي سعيد الناصيري القيادي السابق بحزب الأصالة والمعاصرة وعبد النبي بعيوي القيادي السابق بنفس الحزب والرئيس الأسبق لجهة الشرق والمتابعين معهم فـ ما يعرف بقضية “إسكوبار الصحرا”.

وسمعت اليوم المحكمة لنسيب سعيد الناصيري، ونفى انه كان مدير ديال مركب الوداد الرياضي، وأكد انه كان مكلفو سعيد الناصيري باش يقضي له الأغراض الشخصية ديالو ويتسخر له، وبهذا الخصوص وضح امبارك المسكيني محامي سعيد الناصيري، وقال: “هذا الرجل اللي تنسب له انه كان مدير ديال مركب بنجلون جا قال انه لم يسبق له كان مدير للمركب، والأكثر من هذا قال انه عمرو كان خدام فـ الوداد، فـ الفترة اللي كان فيها سعيد الناصيري رئيس الوداد قال انه عمرو ما كان خدام فـ الوداد، وقال انه بالفعل كنت خدام مع سعيد الناصيري نسيبي كانتعاون معه ملي كايحتاجني كايعيط ليا كنت كانمشي عندو للدار كانتسخر له فـ الأمور الخاصة به بحكم ان ولادو ما كايكونوش أنا اللي كنت كانتكلف بالأمور الخاصة ديالو، وأنا نسيبي هذا يعيط ليا ونمشي عندو، ولكن الوداد ما كنتش خدام فيها”.

المحامي ديال الناصيري، كمل وقال: “الإدارية بالنادي اللي كانو سمع لها خلال الجلسة الماضية أكدت انه هذا الرجل ما عمرو كان خدام فـ الوداد، وكيفاش غايكون هذا السيد مدير ديال بنجلون ما قدرات حتى شي جهة تجيب لينا شي ڤيرمون واحدة دازت لهذا الرجل من حساب الوداد ملي كان سعيد الناصري رئيس للنادي، وهذا الشي اكد مرة أخرى ان أمور كثيرة كانت تقالت خلال مرحلة الضابطة القضائية ماشي صحيحة”.

وبخصوص ادعاءات الحاج أحمد بنبراهيم الملقب بـ “المالي” بأن سعيد الناصيري مع مافيا الاتجار بالمخدرات، وضح المحامي امبارك المسكيني وقال: “هذا المالي قلنا من النهار الأول انه كذاب، وهو أصلا تحكم بـ10 سنين، ونهار استمعت له المحكمة قالها أنا ما كانبيعش الحشيش، وكان كايقول أنا لا علاقتي لي بالمخدرات ونهار اللي تحكم عاد ولى كايبيع الحشيش، هو بعدا راه كذب على القضاء المغربي، ملي سمعو له بقى كايحلف بگاع الحجات اللي دار القبالي بربعة والإيمان وقالهم انه ما كايديرش داكشي، وتحكم بـ10 سنين وملي ضرب 10 سنين عاد ولى كايدير الحشيش وولى خاصو يلصقها فـ شي وحدين اخرين باش يخرجوه من الحبس، المغاربة كاملين من طنجة للگويرة حتى واحد فيهم ما قال ان سعيد الناصيري كايدير الحشيش، واش يقولها المالي بوحدو ونتيقوه؟! ياك قال ان الناصيري كان كايدير اللوجيستيك وكايعيط على البوليس باش يدوزو الحشيش؟! حنا ما كانقولوش يجي شي بوليسي أو دركي يقولينا راني خدمت مع سعيد الناصيري، يا ودي يقولينا سعيد الناصيري اتصل بيا وما بغيتش له، هنا نقولو كاينة الشبهة ولكن هذا الشي ما كاينش، ما يجيوش هاد الناس ديال البوليس والدرك والجيش والجنرالات يقولو لينا أنهم كانو كايخرجو الحشيش وكايديرو اللوجيستيك ويكاخدمو معه (سعيد الناصري) يجيو غير يقولو لينا راه اتصل بينا سعيد وما بغيناش نقولو كائنة الشبهة، ولكن ما كاينة حتى حاجة من هذا الشي، كاين واحد الكذاب (المالي) صدقوه بوحدهم وكذبو گاع المغاربة.