كود الرباط//

بعد عشر سنوات من القحط والمعاناة مع قلة التساقطات، المغرب كيشهد بداية انتعاشة مائية مهمة، كتظهر من خلال الأرقام الجديدة الصادرة عن وزارة التجهيز والماء. فحسب المعطيات الرسمية ليوم 23 مارس 2025، نسبة ملء السدود بلغت 37%، أي ما يعادل 6.230 ملايير متر مكعب من المياه.

هاد الرقم مهم بزاف وغادي يتزاد مع الأيام المقبلة، خصوصا بالمقارنة مع نفس الفترة من العام الماضي، 23 مارس 2024، حيث ما كانتش نسبة الملء كتجاوز 26.56% فقط، بما مجموعه 4.282 ملايير متر مكعب. هاد الفرق كيبين بوضوح أن التساقطات الأخيرة رجعات الروح للمخزون المائي الوطني.

التساقطات اللي عرفاتها مختلف جهات المغرب فالسيمانات الأخيرة خلات فرحة كبيرة عند الفلاحين ومربي الماشية، خصوصا فالمناطق اللي كانت كتعاني من ندرة الماء وتراجع المحاصيل.

الفلاحة ديال الحبوب، والبذور الزيتية، وحتى الأشجار المثمرة بداو كيتعافاو، وكيبان الأمل فواحد الموسم فلاحي واعد. هادشي غادي ينعكس كذلك على أثمنة المنتجات الفلاحية اللي كانت مرتفعة فالسوق، وغادي يساهم ف عودة التوازن بين العرض والطلب.

بهاد الشتا، فالمغرب غادي يعيش أحسن بعد 10 سنين من ’’القحط‘‘. ولكن فحالة يلا تم تدبير أفضل للمياه.

عودة الأمطار وارتفاع نسبة المياه فالسدود كيْعني انطلاقة جديدة لقطاع الفلاحة، وتحسّن فالظروف المعيشية، خاصة فالعالم القروي، اللي كان كيْعاني من أزمة ماء وخصاص فجميع المستويات.

وزارة التجهيز والماء، تتابع الوضع يومياً، والتقارير كتشير إلى استمرار تحسن نسبة الملء فعدد من الأحواض، خصوصا فالشمال والوسط.

أمطار الخير جات فالموعد، ورفعو نسبة ملء السدود، وعطات أمل للمغاربة بموسم فلاحي مُفرح بعد سنوات الجفاف. كما أنها عتقات الحكومة من الحظ السيء ف كل عام، يعني غادي تحقق نسبة نمو مزيانة وغادي تشتغل ف ظروف عادية عكس السنوات السابقة.