كود كازا//
عينين المتابعين كاملة كتشوف فسبيطار ابن رشد فكازا، اللي كيدير التشريح الطبي الثلاثي فالقضية ديال الشاب محمادينو اللي ولات كتشغل الرأي العام فالمغرب وكترفع بزاف ديال الأسئلة على العدالة والحق فالكشف على الحقيقة كاملة.
فهاد الإطار، وجّه الأستاذ الدكتور صبري لحو، محامي السيدة تودا وعضو فـ“قافلة أكبار من أجل العدالة”، نداء مؤثر لمستشفى ابن رشد، كيطالب فيه الأطباء والمسؤولين يراعيو المعاناة الكبيرة اللي كتعيشها الأسرة وهي كتسنى النتائج النهائية. وقال بالحرف: “من نهار خرجات الجثة من القبر، والوقت كيدوز علينا بحال لعوام، كل دقيقة كتساوي شْهور من الألم والانتظار.”
القافلة الحقوقية “أكَبار من أجل العدالة” وصلات مؤخراً لمحكمة الاستئناف فالراشدية، فإطار متابعة تطورات هاد الملف اللي ولى رمز لمطلب الإنصاف والكرامة. الأجواء قدام المحكمة كانت كلها ستريس، والناس اللي جاو مع القافلة عبّرو على الإصرار ديالهم باش يواصلو الضغط الأخلاقي والحقوقي حتى تبان الحقيقة كاملة.
وقبل ما يدخل المحكمة، قال الأستاذ صبري لحو فتصريح قصير: “العدالة ماشي غير مسطرة قضائية، العدالة واجب أخلاقي ومسؤولية جماعية تجاه روح المغدور لي كيتسنى الإنصاف.” وزاد وقال أن القافلة رسالة وفاء للحق ولعائلة لي فقدات ولدها فظروف غامضة كتحتاج توضيح وشفافية.
القضية اليوم خرجات من الإطار ديال الملفات القضائية العادية، وولات امتحان حقيقي للضمير ديال العدالة فالمغرب، فوقيتة لي الناس كيتمنّاو يشوفو مؤسسات كتنصفهم وترد الثقة فميزان الحق.
