كود مراكش ///

علمت “كود” أن 5 أشخاص من بينهم مسنين باقي محاصرين فواحد جبل باقليم شيشاوة، يومين هادي بلا غطا ولا ماكلة.
هاد الناس هوما من الرحل، كاينين فدوار تيشكا نايت تكسيت، جماعة ايمي ندونيت، دائرة امجاط اقليم شيشاوة. وفاتصال مع “كود” قال الحنفي اوبلا، 29 سنة، وهو من بين المحاصرين مع 4 رحل اخرين، بلي :”كيتواجد بين تيكوكا وايمي ندونيت ومقدروش يهبطو للدوار حيث الطريق كاطيح فيها الحجر” يضيف ل”كود”.

الحنفي اكد لـ”كود” باللي :”ما عندنا لا ماكلة ولا ماء ولا والو.. يومين هادي ماكلينا”، موضحا ل”كود” بلي “هوما غير رجال ماكاينيش لا اطفال ولا نساء، ولكن كينين رجال فايتين 70 سنة وكيتعذبو فالبرد”.

وطالب الحنفي من السلطات عبر “كود” تدخل وتعاونهم وتنقذهم، مضيفا في تصريح لـ”كود” بلي الهيلوكبتر كادوز فوق منهم ولكن مشات لدوار تيكوكا”.