كود – سبتة //

3 سنين وهما كيتلاقاو حسي مسي، قبل ما يقررو يهربو من المغرب ويمشيو لسبتة باش يعيشو علاقتهم بحرية ويحاولو يتزوجو ويديرو عائلة

نجوى، عندها 20 عام من القنيطرة، وخديجة، 22 عام من طنجة، عاودو لصحيفة «إل بويبلو دي سيوتا» على قصة حب بدات من الفيسبوك وبقات مخبية سنوات.

نجوى، اللي كانت وسط خيمة فحي لا رينا، رفضات تبين وجهها للصحافة ، أما خديجة، اللي كانت عسكرية فالجيش المغربي قبل ما تخرج، فقالت بلي حياتهم كانت فالسكات، وكانو كيتلاقاو غير فالديور.

الكوبل، قررو يدوزو الحدود من تراخال وسط الصداع اللي عرفاتو سبتة، ومن بعد الوصول، لقاو راسهم وسط عشرات العيالات فمخيم مؤقت داروه سكان حي لا رينا، بعدما وفروا ليهم الفراش والما والماكلة والحوايج.

وخا الظروف الصعيبة، الرجوع للمغرب ما داخلش فالحسابات ديالهم ،خديجة قالت بلي كيفضلو يتحملو المحاين فسبتة على الرجوع، قبل ما يحاولو يمشيو للبر الرئيسي الإسباني ويبنيو حياة مستقرة.

الكوبل  باغين يسويو وضعيتهم القانونية، ومن بعد يعلموا عائلاتهم بأنهم غادي يتزوجو.

الكوبل صرحو لجريدة أنهم «باغين عرس كبير، إن
، وباغين حتى يكونو عندنا الدراري»، قالت خديجة، وفق ما نقلتو الصحيفة الإسبانية.