كود سبور//

غيدير يحيى جبران لاعب الوداد الرياضي فحوصات طبية للتأكد من السلامة ديالو، بعدما غيباتو الإصابة من ماتش الفريق البارح السبت ضد اتحاد طنجة برسم الدورة 6 من البطولة الاحترافية.

الطاقم الطبي للوداد الرياضي وبعدما نصح المدرب عادل رمزي باش ما يلعبش يحيى جبران ضد اتحاد طنجة، بسبب إصابة خفيفة عندو، قرر يدير له فحوصات طبية أكثر دقة باش يتهناو على الحالة ديالو ويحيدو الشك.

وكان يحيى جبران سافر مع الوداد الرياضي الجمعة الماضي من كازا لطنجة فالبراق، بعدما تدرب مع الفريق فتيران بنجلون فأخر حصة تدريبية، ومن طنجة مشاو لتطوان باش يلعبو قبل ما يتفاجأ كلشي بالغياب ديالو على التشكيلة ضد الطنجاويين.

وما كانش غياب يحيى جبران على الوداد الرياضي ضد اتحاد طنجة مؤثر، حيث الفريق لعب مرتاح وتحكم فالمباراة مزيان وربح بثلاثية لزيرو، وكان يحيى عطية الله هو الكابيتان فبلاصة جبران، مع العلم أن الحمرا غاب عليه حتى صامبو وزولا حيث حتى هما موعتين.