گود سبور//

تقتلت لاعبة منتخب الأرجنتين النسوي فولورينسيا گينازو، واللي قتلها رجلها اللي واقفة هي وياه على الطلاق، قبل ما يدير حد لحياتو حتى هو ويصفيها لراسو.

وحسب الاعلام الارجنيتيني، فاللاعبة فلورنسيا گينازو، اللي عندها 30 عام لاعبة منتخب الأرجنتين وفريق أرجنتينو ميندوزا الأرجنتيني، لقاوها مضروبة ومخنوقة فالشومبر دسال النعاس فين كانت كتنعس هي ورجلها اگنتسو  نوتو قبل ما يخرج من الدار.

وأن الجاني خلا ولادهم كيلعبو فشي صال اخرى فالدار باش يدير الجريمة ديالو، وأن ولدهم الكبير اللي عندو 7 سنين، مشى للشومبر ديال النعاس وما قدرش يحلها وقالها للجيران اللي عيطو على البوليس، اللي وضحو فبلاغ لهم أن تشريح الجثة كشف بلي اللاعبة ماتت خنقا وان الحادث جا من ورا ما دازت 5 اشهر على شكاية حطتها ضد رجلها، واتهماتو بالعنف الجسدي ولكن ما كانتش الأدلة كافية ضدو وخرج من الدار فشهر نوفمبر 2023.

أما نادي أرجنتينو ميندوزا فريق المتوفية، كشف فبيان له أن اللاعبة ضربها رجلها إگناسيو نوتو حتى ماتت وهو ينتحر من وراها، وبلي واخا مازال مزوجين قدام القانون ولكن راهم مفارقين، وأن الراحلة كانت ديما كتشكى منو، وبلي تشد وطلقوه فنوفمبر 2023.