كود -وكالات//

خرجات جورجينا رودريغيز، خطيبة النجم البرتغالي كريستيانو رونالدو، على سكاتها بعدما تعرضات لموجة ديال التعليقات اللي كتنتاقد جسمها، خصوصاً من بعد ما تنشرات ليها صور بالبكيني فوق يخت، وقالت فرسالة طويلة على إنستغرام إنها تفاجأت بلي كاينين ناس كينعتوها بـ”الغليضة”، وخا أنها عمرها ما كانت كتشوف قيمة الإنسان فالشكل ديالو.

وقالت جورجينا: “جسمي غادي يتبدل مع الوقت، كيف كيوقع مع أي امرأة، وهاد الشي كيعني أنني ما زلت عايشة.” وزادت أنها بغات تعلم بناتها أن قيمة الإنسان ماشي فالمظهر ديالو ولا فآراء ناس ما كيعرفوهش.

وكشفت أنها هضرات مع رونالدو على هاد التعليقات وقالت ليه: “اللي مخوفني هو أن الناس ولاو كينعتوني بالسمينة، وأنا عايشة من صورتي”. لكن رونالدو جاوبها بطريقة رفعات ليها المعنويات، وقال ليها: “أنتِ ما كتعيشيش من صورتك، كتعيشي من شخصيتك أنتِ امرأة استثنائية، زوينة، عندك جسم جميل، أم رائعة، إنسانة مزيانة وناجحة، وكتعيشي حياتك بالحب. آش خاصك أكثر من هاد الشي؟ طبيعي يكونو كاينين ناس كيحسدوك”.