كود بنگرير ///

البارح السبت 19 ابريل 2025 بجامعة محمد السادس متعددة التخصصات التقنية ببنگرير كان اللقاء الاستراتيجي الرابع بشعار “نتعبئو باش نكلمو ارساء مؤسسة الريادة فالمدرسة المغربية”. هاد لمبادرة اللي كان هندس فكرتها وطلقها شكيب بنموسى وزير التربية الوطنية والتعليم السابق. الوزير الحالي محمد سعد برادة جا يكمل هاد الورش اللي معولة عليه حكومة ودولة باش ينقد التعليم من وضعيتو الكارثية. 

فهاد اللقاء اللي سميتو استراتيجي كيتجمعو فيومين مسؤولو وزارة لتربية الوطنية مع ناس الاكاديميات وباقي مؤسسات الوزارة بما فيهم شهادات لرجال التعليم. كلهم كيجيو من جهات المغرب 12 باش يهدرو على مدارس الريادة. اجتماع بلا گرافاطا بلا رسميات. اگورا فقاعة دائرية بلا رسميات باش كل واحد يهدر على تجربتو مع “مؤسسة الريادة”.

وزير التربية الوطنية والتعليم قال فالنهار الاول علي “الطابع الجماعي لهذا لمشروع “مؤسسات الريادة”. قال بللي هاد المشروع ممكن ينجح ايلى كانت روح الفريق فالخدمة. برادة الوزير مقتانع بالنجاح. استلهم شعار اوباما “Yes We Can”، باش يهدر على  الإيمان الجماعي بقدرة الجميع على بلوغ الأهداف المسطرة. مقتانع بللي ممكن يتحسن  تعلم التلميذات والتلاميذ والحد من الهدر المدرسي. وذكر باللي مهنتو كمهندس كيخليه يأمن بحل المشكلات فوقتها. ماشي يخليها عالقة.

الهدرة بوحدها ما كافياش طبعا. كانو قبل برادة مهندسين وما نجحوش فهاد الورش. يمكن حطو شي حجيرات فالساس ولكن تعليمنا مازال اللاور اللاور. 

الوزير هدفو يعمم مدارس الريادة اللي بدات ب600 مدرسة ابتدائية وولات الفين. وعد بتعميمها ب70 بالمائة بعد نهاية هاد الولاية الحكومية الحالية. وهدر على بداية تجربة الريادة فالاعداديات ووصلات دابا 230 اعدادية وقال باللي هاد الشي حتى هو غادي يتعمم ب50 بالمائة.