كود سبور//

ما قدروش الرياضيين المغاربة المشاركين فأولمبياد باريس 2024، حتى لدابا يدوزو من الأدوار الأولى إلى الأدوار النهائية، وكان مصير بزاف منهم توديع المسابقات وحنا يالاه اليوم الاحد فثاني أيام الأولمبياد.

واحتلت مجدولين العلوي المركز الأخير فالسلسلة الاستدراكية فرياضة التجديف، وما قدرتش تتأهل لربع النهائي.

وما قدرتش يسرى زكراني تتأهل إلى ثمن نهائي المسايفة، بخسارتها أمام البولندية مارتينا جيلينسكا، بنتيجة 15-3، ونفس الحاجة وقعت لحسام الكرد، اللي خسر الكزاخيستاني  روسلان كوربانوف من كازاخستان.

وخسرت سمية إراوي مع القبرصية صوفيا أسفيستا، فوزن أقل من 52 kg فالجيدو، ونفس الشي لعبد الرحمان بوشيتا اللي خسر مع الإسرائيلي باروش شمايلوف، فوزن أقل من 66kg.

وما قدراتش السباحة إيمان البارودي تتأهل للدومي فينال ديال 100 متر على الصدر سباحة، واخا جات الثانية فالسلسلة ديالها توقيت دقيقة و14 ثانية و57 جزء من المائة ما عاونها باش تتأهل.