كود هند لكلاوي مراكش ////

اليوم السبت 6 دجنبر 2025 غادي تختاتم الدورة 22 من المهرجان الدولي للفيلم بمراكش. بعد الاعلان على الفائز فنجمة مراكش الذهبية وباقي الجوائز من المفروض فهاد الحدث يكون غدا او الاثنين اللي جاي تقييم موضوعي للدورة. تقييم بلا لحيس الكابة والتمجيد الخاوي. تقييم لرئاسة الامير رشيد لمؤسسة مهرجان مراكش فهاد السنوات الاخيرة وتقييم حتى اللي كانو قبلو. باش يكون التقييم موضوعي.

المهرجان حدث كبير خاصو يبقى ويتطور. خاصو المغربة توصل 100 فالمائة. تصورو 22 دورة ومازال ما قدرناش نمغربوه. اللي كنقصد بالمغربة ماشي تجيب ليه اطر مغربية عايشة فالمغرب. اللا. جيب لي مغاربة العالم ولكن يكون فيه لمغاربة فمراكز القرار. حنا مازال عندنا ميليتا توسكان دو بونتيي اللي ورثها المهرجان على راجلها رئيس اول دروة الراحل دانيال توسكان دو بلانتيي.

كاين مجموعة من القراءات لهاد المهرجان. كنظن حان الوقت يكون تغيير فرئاستو. تجي دماء جديدة.

هادا جانب. نهدرو على التواصل. تكلفات بيه من نهار جابو هاداك علي حجي منسقا عاما للمهرجان، شركة “أ 3 للتواصل” لصاحبتها نايلة التازي مستشارة ففريق الباطرونا فمجلس المستشارين للولاية الثانية. ديرو انتوما طلة على شي انتاجات على تغطية المهرجان باش تعرفو الهاجس اللي كيحكم هاد الوكالة وكيحكم شريكها هاداك حجي.
كاين تغطيات انتصرات للسينما ولكن شي تغطيات لا علاقة ديال شي صحف ما كيعرفها حد الا نايلة التازي.

هاد العضوة فمجلس المستشارين كتوظف المهرجان باش يلمع ليها صورتها. كتعرض على اللي كيبان ليها غادي ينتاقدها او يهاجمها. كتوظف مهرجان كيرأسو الامير رشيد لمصالحها. “كود” كانت اتصلات بفيصل لعرايشي نائب رئيس مؤسسة مهرجان مراكش بخصوص عدم الرد على اعتماد مصور صحافي ديال كود فهاد المهرجان. اكد لعرايشي ل”كود” باللي بالنسبة للمؤسسة ما دايرة اعتراض حتى على وسيلة اعلام وباللي مكلفة بهاد الشي شركة اللي هي “أ 3 للتواصل”. ناس نايلة بغاو يروجو باللي المؤسسة هي اللي معتارضة. دابا كلشي طلع كذوب

باش تكون المصالح الشخصية متحكمة فخدمة بحال هادي كتكون النتيجة شي تغطيات تاريخية لهاد الحدث السينمائي لكبير.

البارح المخرج نور الدين لخماري قال باللي “السينما الوطنية أصبحت اليوم قوة ناعمة قادرة على تقديم المغرب الحديث كما هو، بثقافته وإنسانيته وتاريخه ورؤاه” واضاف لوكالة المغرب العربي للانباء بعد عرض فيلمه الاخير “”ميرا” بالمهرجان الدولي للفيلم بمراكش، إن هذه التظاهرة التي بلغت دورتها الثانية والعشرين، تعد منصة عالمية وواجهة حقيقية لإبراز الصورة الحديثة للمغرب، بعيدا عن القوالب النمطية والفولكلورية المتداولة”. دابا وصلنا يا السي نور الدين للدورة 22 ومازال ما كاينش فيلم مغربي مغربي فالمسابقة الرسمية للمهرجان. جبنا فيلم “ورا النخلات” لمريم بنمبارك وجنسناه. عندو جنسية مغربية فرنسية بلجيكية ونگليزية. كيفاش دير قوة ناعمة وما عندك حتى فيلم مغربي فالمسابقة الرسمية؟

هادي راها شوهة لمهرجان كيبيعوه لينا وصل للنضج وووو. ثم اش من قوة ناعمة ونجمة كبيرة بحال جودي فوستر قالت ليك كتعرف المغرب غير بتأهلو لنص نهاية المونديال اللي دار فقطر. الكورة هي القوة الناعمة. راه شوهة ومعيورة للمهرجان ديال السينما تجيب سينمائي كبير ما كيعرفش لبلاد الا بالكورة.
عليها خاص امور كثيرة تتغير فالقادم من الدورات.