كود سبور//
فرگع الدولي المغربي نايف أگرد والفريق ديالو ريال سوسيداد مفاجأة كبيرة فبطولة الصبليون، وربحو البارصا اللي متصدرين، اليوم الأحد برسم الدورة 13.
وسالا الماتش بين ريال سوسيداد والبارصا بنتيجة واحد لزيرو بين الفريقين، وهو الهدف اللي ماركاه بيكير فالدقيقة 33 لريال سوسيداد، وقدرو يبقاو محافظين عليه حتى سالات المباراة، اللي قدم فيها المدافع المغربي نايف أگرد مستوى كبير، واخا كان جدل على هدف حيدو الفارّ البارصا بداعي التسلل على ليفاندوفسكي فلقطة مشتركة مع نايف أكرد.
وبالحضىور ديالو فماتش ريال سوسيداد والبارصا أكد نايف أكرد، أنه بخير وما عندوش شي إصابة، وغايجي يلعب مع المنتخب المغربي السيمانا الجايا ضد الگابون وليسوتو برسم إقصائيات كأس إفريقيا 2025.
وبهذه النتيجة عطاو ريال سوسيداد كادو للمطاردين ديال البارصا، والأخير بقات عندو 33 نقطة ومتصدر على بعد 6 النقاط من ريال مدريد الثاني، أما ريال سوسيداد عندهم 18 نقطة ومحتلين المركز 8.
