كود سبور//

غايكون الدولي المغربي نايف أگرد من أبرز غيابات فريق ريال سوسيداد ضد ريال مدريد الأربعاء الجاي فكاس ملك إسبانيا، وممكن يكون من أبرز غيابات البارصا الاحد الجاي ضمن منافسات بطولة الصبليون، ويقدر يغيب لمدة أطول.

وموقف الدولي المغربي نايف أگرد بسبب جمع البطائق الصفرا، وما يقدرش يلعب الماتش الجاي ضد ريال مدريد فكاس ملك إسبانيا، وبالإضافة إلى هذا الشي فهو موعت وفالشك واش يقدر يلعب ضد البارصا الاحد الجاي برسم الدورة 26 من لاليگا، فبالإضافة للتوقيف ديالو، فهو توعت فماتش الويكاند اللي فات ضد ليگانيس برسم الدورة 25 من لاليگا.

وحسب مدرب ريال سوسيداد إمانويل ألگواسيل، فنايف أگرد موعت فالفخذ ديالو، ويمكن يكون عندو شي تمزق، وخاصهم يتسناو نتائج الفحوصات الطبية باش يعرفو بالضبط الحالة ديالو وشحال المدة للي ممكن يغيب.

ولاعبين ريال سوسيداد ضد ريال مدريد الاربعاء الجاي فكاس ملك اسبانيا، والاحد الجاي لاعبين ضد البارصا برسم الدورة 26 من بطولة الصبليون وفالدورة 27 لاعبين اشبلية، وغياب نايف أكرد يعتبر ضربة خايبة للفريق الاسباني، حيث هو من الركائز ديالو.