كود – عثمان الشرقي //

مؤخرا ترونات فالساحة الفنية الأمازيغية بين معسكر احوزار ومعسكر لحسن الخنيفري ، مني ولا كل طرف كيدافع بقوة على الفنان ديالو المفضل، الشي اللي خلا البعض يسول واش فعلاً كاينة مواجهة فنية حقيقية بين الفنانين؟ ولا غير نايضة بين الجمهور على مواقع التواصل الاجتماعي؟

الدخان خرج من الغار بسباب أغنية “أسردون” (البغل) ديال الفنان أحوزا اللي عاود غناها بستيل جديد فتوقيت حساس وتبارطاجات بشكل كبير هاد السيمانة فالسوشيال ميديا وطلعات تراند، وهاد الشي خلا بعض المتابعين للشأن الفني يديرو قراءات وتأويلات كتربط مضمونها بالفنان لحسن الخنيفري.

فالمقابل خرج الفنان لحسن الخنيفري بأغنية حتى هو بعنوان  “أفقير” و كاين اللي شاف أنها فيها تلميحات و رسائل موجهة لأحوزار فمحاولة لرد الاعتبار ، وخا أنه ما كاين حتى تصريح رسمي من الطرفين كيأكد بلي كاين خلاف بيناتهم.

بزاف ديال المتابعين قالو ان المشكل سبابو التنافس على استقطاب الشيخات طوندونس ولي من ضمنهم الشيخة هدى اللي كانت مع لحسن الخنيفري  قبل مترجع مرة أخرى مع احوزار، بعض المتتبعين فسّرو هاد الخطوة على أنها من بين الأسباب اللي زادت صداع بين الجانبين حيث استقطاب الشيخات من هاد الطينة كيبقى عنصر مهم فنياً وتجاريًا فهاد الضومين، بحكم دورهم الكبير فنجاح الحفلات .