كود – وكالات//

عرفات منطقة الشارون وسط إسرائيل، صباح اليوم الحد، عملية طليق القرطاس متابعة داروها جوج مسلحين من مدينة الطيبة، واللي خلات قتيل و6 ديال الجرحى، منهم جوج حالتهم خطيرة، وسط استنفار أمني كبير وتحقيقات مازال متواصلة.

وبدات العملية حدا محطة للوقود فكوخاف يائير، قبل ما تتوسع لمناطق أخرى بحال تسور يتسحاق وتسور ناتان، وحسب فرق الإسعاف الإسرائيلية، راجل عندو 35 عام مات متأثراً بالإصابة ديالو، فيما تنقلو خمسة آخرين للسبيطار باش يتلقاو العلاجات الضرورية.

ووفق المعطيات الأولية، قوات الأمن الإسرائيلية قدرات تقتل واحد من المشتبه فيهم فبلاصت الحادث، كيف ما مازال البحث على واحد آخر كيشكّو باللي هرب ومن بعد الهجوم، تفعلات حالة الاستنفار فعدد من المناطق المجاورة، وطلبو من السكان يبقاو فديورهم حتى تسالي عمليات التقلاب.

مصادر أمنية إسرائيلية قالت بلي المشتبه فيه اللي تقتل هو عمر ياسين، من سكان مدينة الطيبة، وكان معروف عند البوليس بسبب عدد من القضايا الجنائية، وكتشير المعلومات الأولية باللي استعمل طوموبيل مسروقة فتنفيذ الهجوم اللي استهدف أكثر من موقع فالمنطقة.

ومازال السلطات الإسرائيلية ما خرجاتش برواية رسمية نهائية بخصوص دوافع العملية أو جميع تفاصيلها، بينما كيتواصل التحقيق مزال خدامة.